Қашқадарёда ҳоким ёрдамчиси ва шаҳар ҳокимлиги етакчи мутахассиси пора билан ушланди
Улар ижара шартномаси асосида берилган давлат захирасидаги ерни хусусий мулк сифатида расмийлаштириб бериш учун пул олган.
Қарши шаҳридаги маҳалла фуқаролар йиғинида ҳоким ёрдамчиси ва шаҳар ҳокимлиги етакчи мутахассиси пора билан қўлга олинди. Бу ҳақда ДХХ хабар берди.
Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан олиб борилган текширувда маълум бўлишича, ҳоким ёрдамчиси 1983 йилда туғилган фуқарога 2019 йилда ижара шартномаси асосида берилган давлат захирасидаги 35 сотих ер майдонини ўз танишлари орқали хусусий мулк сифатида расмийлаштириб бериш учун 1000 АҚШ доллари олган.
Тадбир давомида ҳоким ёрдамчиси ушбу пулни шаҳар ҳокимлиги етакчи мутахассисига бериш кераклиги аниқланиб, у ҳам олган вақтда ушланди.
Ҳозирда қонунбузарларга нисбатан жиноят иши қўзғатилган ва тергов ҳаракатлари олиб борилмоқда.
