БАА ҳаво ҳудудининг ёпилиши яна бир ҳафтага узайтирилди
Чекловлар транзит рейсларга ҳам таъсир кўрсатмоқда.
Бирлашган Араб Амирликлари мамлакат устидаги ҳаво ҳудудининг қисман ёпилишини яна етти кунга узайтириш тўғрисида қарор қабул қилди. Бу ҳақда ТАСС Яқин Шарқдаги ҳаво ҳаракатини бошқариш тизимидаги манбаларга таяниб хабар берди.
Маълум қилинишича, жорий этилган чекловлар 2026 йил 30 март куни UTC бўйича соат 12:00 гача амал қилади. Қарор минтақада давом этаётган ҳарбий кескинлик, хусусан АҚШ ва Исроил томонидан Эронга қарши бошланган ҳарбий операциялар фонида қабул қилинган.
Аввалроқ Россия Транспорт вазирлиги ҳам Яқин Шарқдаги бир қатор давлатлар ҳаво ҳудуди парвозлар учун ёпиқ қолаётганини маълум қилган эди.
Ушбу рўйхатга Исроил, Эрон, Ироқ, Баҳрайн, Қатар, Қувайт, Умон, БАА, Саудия Арабистони ва Сурия киритилган.
Чекловлар транзит рейсларга ҳам таъсир кўрсатмоқда. Авиакомпаниялар хавфли деб ҳисобланган ҳудудларни четлаб ўтиш учун парвоз йўналишларини ўзгартиришга мажбур бўлмоқда.
Шунингдек, экипажларга ҳаво ҳаракатини бошқариш хизматларидан келадиган барча оператив билдиришномаларни диққат билан кузатиб бориш тавсия этилган.
