Доналд Трамп ва Си Жинпин учрашуви Эрон можароси тугагунча кечиктирилади — Politico
Бироқ Оқ уй учрашув ўтказилиши Эрон уруши билан боғлиқ эмаслигини билдирди.
АҚШ президенти Доналд Трамп ва Хитой раҳбари Си Жинпин ўртасида режалаштирилган учрашув Эрон билан боғлиқ можаро фонида номаълум муддатга кечиктирилмоқда. Бу ҳақда Politico манбаларга таяниб хабар бермоқда.
Вашингтондаги манбаларга кўра, саммит саналари фақат можаронинг фаол босқичи якунлангач таклиф этилиши мумкин.
Бироқ Оқ уй бу маълумотни рад этиб, учрашув ўтказилиши Эрон уруши билан боғлиқ эмаслигини билдирди.
Расмийлар АҚШ ва Хитой ўртасида музокаралар давом этаётганини ва янги саналар яқин орада эълон қилинишини айтагн. Хитой элчихонаси эса кечикиш ҳақида аниқ маълумот бермаган.
Дастлаб март ойи охирига режалаштирилган учрашув Трамп томонидан “уруш давом этаётгани” сабаб бир неча ҳафтага ортга сурилган. Кейинчалик у учрашув тахминан бир ярим ой ичида ўтказилиши мумкинлигини айтган. Оқ уй вакиллари эса унинг май ойидан кейинга қолиши эҳтимолини ҳам истисно этмаяпти.
Эрон билан можаро тўртинчи ҳафтага кирар экан, АҚШ минтақада ҳарбий фаолликни кучайтирмоқда. CBS News манбалари Эрон ҳудудига қуруқлик қўшинларини жойлаштириш бўйича режалар ишлаб чиққанини ва Форс кўрфази ҳудудига минглаб ҳарбийлар юборилаётганини хабар қилган.
Шу билан бирга, Трамп қўшин юбориш режалари бор-йўқлигига аниқ жавоб бермай, бундай қарорлар ошкор этилмаслигини таъкидлаган.
Мутахассислар фикрича, давом этаётган можаро шароитида бундай юқори даражадаги учрашувни ташкил этиш мураккаб. Шунга қарамай, АҚШ ва Хитой ўртасидаги нозик савдо мувозанатини сақлаш учун икки давлат етакчилари ўртасидаги мулоқот муҳим ҳисобланади.
Трамп аввалроқ Яқин Шарқдаги ҳарбий операцияларни қисқартириш эҳтимолини ҳам истисно этмаган ва АҚШ ўз мақсадларига яқинлашаётганини билдирган. У, шунингдек, Ҳормуз бўғози хавфсизлигини таъминлашда иттифоқчилар ролини ошириш мумкинлигини таъкидлаган.
Доналд Трамп ва Си Жинпин ўтган йил Жанубий Кореяда бўлиб ўтган учрашувда савдо кескинлигини юмшатиш бўйича келишувга эришган эди. Хитой АҚШ қишлоқ хўжалиги маҳсулотларини харид қилишни оширишга ва айрим экспорт чекловларини юмшатишга рози бўлган, АҚШ эса юқори божларни жорий этишни вақтинча тўхтатган.
