Ким Чен Ин яна Шимолий Корея президенти этиб сайланди

Ким Чен Ин мамлакатнинг Олий Халқ Ассамблеясининг биринчи сессиясида президент лавозимига қайта тайинланди. Бу ҳақда Reuters Шимолий Корея давлат нашри KCNA'га таяниб хабар бермоқда.

 

Ким 1948 йилда бобоси Ким Ир Сен томонидан асос солинган давлатнинг учинчи авлод ҳукмдори бўлиб, отаси 2011 йилда вафот этганидан бери мамлакатни бошқариб келмоқда.

 

Қайд этилишича, Пхеняндаги йиғилишда социалистик конституцияга ўзгартиришлар ва қўшимчалар, шунингдек, Давлат Ишлари Комиссияси раиси ва бошқа давлат раҳбарлиги органларини сайлаш масалалари кўриб чиқилди. Ассамблея шунингдек, февраль ойида бўлиб ўтган IX партия конгрессида эълон қилинган беш йиллик иқтисодий режани ҳам муҳокама қилган.

 

“Диққат марказида эса, Пхенян Жанубий Кореяга нисбатан Ким Чен Иннинг “икки душман давлат” сиёсатини расмийлаштириш учун конституцияни ўзгартирадими деган савол турибди. Сўнгги йилларда етакчи Шимолий Кореянинг узоқ йиллик тинч бирлашиш мақсадини четга суриб, Жанубий Кореяни душман давлат сифатида қайта эълон қилди”, деб ёзмоқда агентлик.

 

Йирик сиёсий шахс, Ким Чен Иннинг синглиси, Ким Ё Чен эса,  Давлат Ишлари Комиссияси аъзолари орасида кўрсатилмаган. Жанубий Корея Бирлашув Вазирлиги бу ўзгариш сабабини ўрганаётганини билдирса-да, экспертлар бу унинг таъсир кучи камайганини билдирмаслигини таъкидлашмоқда. 

 

Кюнгнам Университети профессори Лим Эул-чулнинг фикрича, унинг рўйхатдан йўқлиги мақомининг пасайганини эмас, балки стратегик роль тақсимотини кўрсатади.

 

Ушбу йиғилиш Шимолий Корея етакчилигида сиёсий ва иқтисодий йўналишларни белгилашда муҳим воқеа сифатида баҳоланмоқда.