Нью-Йоркдаги Ла-Гуардиа аэропорти Air Canada самолёти ўт ўчириш машинасига урилгани сабаб ёпилди

Монтреалдан келаётган Air Canada Express 8646-рейс самолёти Нью-Йоркдаги Ла-Гуардиа аэропортига қўнаётганда ер усти транспорт воситасига урилди ва бу аэропортнинг ёпилишига сабаб бўлди, деб хабар бермоқда Al Jazeera.

 

Нью-Йорк полицияси AFP агентлигига душанба куни самолёт “порт маъмурияти транспорт воситасига урилди” деб маълум қилган. 

 

Reuters'га кўра, ҳодиса натижасида 4 киши жабрланган. Самолётнинг учувчилари жиддий жароҳат олган. ўт ўчириш машинасидаги сержант ва полиция ходимининг суяклари синган, аммо уларнинг ҳолати барқарор. Самолётда 72 йўловчи ва 4 экипаж аъзоси бўлган, ҳозирча йўловчилар орасида жиддий жароҳат олганлар ҳақида маълумот берилмаган.

 

Flightradar24 хабар беришича, CRJ‑ самолёти якшанба кечаси тахминан 24 mph (39 км/соат) тезлик билан транспорт воситасига урилган. Самолёт Air Canada нинг минтақавий ҳамкори Jazz Aviation томонидан бошқарилган.

 

АҚШ Федерал Авиация Администрацияси (FAA) самолёт фавқулодда ҳолати сабабли ЛаГуардиа аэропортига барча рейсларни тўхтатганини эълон қилди. FAA баёнотида аэропорт ёпилиши фавқулодда ҳолат билан боғлиқ эканлиги айтилган, аммо қўшимча тафсилотлар берилмаган.

 

Ижтимоий тармоқларда тарқалган видеолавҳаларда самолёт бурнининг юқорига эгилган ҳолда шикастланганини кўриш мумкин.

 

Шунингдек, Ла-Гуардиа аэропортининг расмий сайтида аэропортга келаётган самолётлар бошқа аэропортларга йўналтирилгани ёки чиқиш нуқтасига қайтарилгани кўрсатилган.

 

Нью-Йорк шаҳрининг фавқулодда вазиятлар бошқармаси аҳолига аэропорт яқинида йўл ёпилишлари, транспорт кечикишлари бўлиши мумкинлигидан огоҳлантирди.