Тошкент вилоятининг тоғли ҳудудларига янги микроавтобус йўналишлари йўлга қўйилди
Йўл ҳақи 10 минг сўм этиб белгиланган бўлиб, қатновлар ҳар куни соат 6:00 дан бошланади.
21 мартдан бошлаб Тошкент вилоятининг машҳур тоғли ҳудудларига олиб борувчи янги 324- ва 325-сонли микроавтобус йўналишлари ишга туширилди. Бу ҳақда “Тошшаҳартрансхизмат” хабар берди.
Қайд этилишича, мазкур йўналишлар Чиноркент, Чимён ҳамда Амирсой каби сайёҳлик масканларига боришни сезиларли даражада осонлаштиради. Янги қатновлар нафақат ҳудуд аҳолиси, балки маҳаллий ва хорижий сайёҳлар учун ҳам қулай транспорт имкониятини яратади.
324-сонли йўналиш Чиноркент темир йўл бекатидан бошланиб, Чимён орқали Қоранқул, Пана меҳмонхонаси, Амирсой, Тибет, Белдерсой, Севарсой, Лайнер, Пирамида ва Бочка манзиллари орқали ҳаракатланади. 325-сонли йўналиш эса ушбу йўналиш бўйлаб тескари тартибда қатновни амалга оширади.
Йўналишларда 16 ўринли, кондиционер билан жиҳозланган замонавий Ford микроавтобуслари хизмат кўрсатади. Йўл ҳақи 10 минг сўм этиб белгиланган бўлиб, тўловни нақд пул ёки банк картаси орқали амалга ошириш мумкин.
Қатновлар ҳар куни соат 06:00 дан бошлаб йўлга қўйилган бўлиб, микроавтобуслар ҳар 15 дақиқада ҳаракатланади. Манзилгача етиб бориш вақти ўртача 40 дақиқани ташкил этади.
