Амир Темур хиёбони ҳудуди вақтинча ёпилади

Тошкент шаҳрининг Юнусобод туманида ободонлаштириш ишлари олиб борилиши муносабати билан 23 мартдан 7 апрель кунига қадар (шу куни ҳам) Амир Темур хиёбони ҳудуди бутун периметри бўйлаб вақтинча ёпилади. Бу ҳақда Тошкент шаҳар ҳокимлиги матбуот хизмати хабар берди.

 

Маълум қилинишича, ушбу чекловлар фақат хиёбон ҳудудига ва уни чегараловчи Махтумқули, Истиқбол, Сайилгоҳ кўчалари ҳамда Амир Темур ва Мустақиллик шоҳкўчаларидаги майдонга тааллуқлидир.

 

Пойтахт ҳокимлиги ободонлаштириш ишлари давомида пиёдалар йўлаклари таъмирланади ва қисман янгиланади, ҳудуддаги муҳандислик коммуникациялари ва суғориш тизими модернизация қилинишини билдирган. 

 

Шу билан бирга, ҳокимлик хиёбон ҳудуди кўкаламзорлаштирилади, кўчатлар экилишини, янгиланаётган суғориш тизими мавжуд яшил майдонларни самарали суғоришни таъминлайди ва сувдан оқилона фойдаланишни йўлга қўйилишини қўшимча қилган.

 

Хабарга кўра, олиб борилаётган ишлар давомида бирорта ҳам мавжуд дарахтга зарар етказилмайди. Автотранспорт ҳаракати туташ кўчаларда одатдаги тартибда давом этади, йўл бўйида тўхтаб туриш имконияти сақланади. 

 

Шунингдек, хиёбонга олиб чиқувчи метро бекатлари чиқиш йўллари вақтинча ёпилади.