Трамп Эрон билан беш кунлик сулҳ эълон қилди

Дональд Трамп АҚШ Мудофаа вазирлигига Эрон энергетика инфратузилмасига режалаштирилган ҳаво зарбаларини беш кунга тўхтатиш бўйича кўрсатма берди.

Унинг маълум қилишича, сўнгги кунларда АҚШ ва Эрон ўртасида Яқин Шарқдаги вазиятни тинч йўл билан ҳал этиш масаласида “самарали ва конструктив” музокаралар ўтказилган. Шу сабабли Эрон электр станциялари ҳамда энергетика объектларига зарба бериш вақтинча кечиктирилган.

 

Трампнинг таъкидлашича, ушбу музокаралар ҳафта давомида давом этади. Музокараларнинг бориши ижобий якунланса, томонлар ўртасидаги кескинликни камайтириш бўйича кенгроқ келишувга эришилиши мумкин.

 

Бироқ Теҳрон расмийлари бундай музокаралар ўтказилаётганини инкор этган. Масъуд Пезешкиан АҚШ президенти баёнотларига муносабат билдириб, Ташқи ишлар вазирлигининг позициясини келтирди: унга кўра, Теҳрон ва АҚШ ўртасида ҳеч қандай музокаралар олиб борилмаяпти.

 

Эрон томони Трампнинг баёнотлари асосан энергетика бозоридаги нархларни пасайтириш ва АҚШнинг ҳарбий режаларини амалга ошириш учун вақт ютишга қаратилган бўлиши мумкинлигини билдирган.

 

Аввалроқ Трамп Ҳормуз бўғози масаласида Теҳронга ультиматум қўйиб, агар бўғоз 48 соат ичида очилмаса, Эрон электр станцияларига зарба берилиши мумкинлигини айтган еди.