Туркиянинг Ҳатай вилояти делегацияси Урганч шаҳрига борди
Ҳатай вилояти аҳолиси Шавкат Мирзиёевнинг таклифига биноан Ўзбекистонга ташриф буюрган.
Ўзбекистонда ташриф билан бўлиб турган Туркиянинг Ҳатай вилояти вакиллари Урганч давлат педагогика институтидаги Наврўз тантаналарида иштирок этадилар. Бу ҳақда Ўзбекистон Туризм қўмитаси хабар берди.
Маълум қилинишича, Туркия вакиллари бугун Урганч халқаро аэропортида кутиб олинган.
“Меҳмонлар Урганч давлат педагогика институтидаги Наврўз тантаналарида иштирок этадилар. Куннинг иккинчи ярмида “Арда Хива” халқаро туризм мажмуаси ва Ичан-Қалъанинг тарихий обидаларини томоша қиладилар”, дейилади хабарда.
Ўзбекистон Республикаси Президенти Шавкат Мирзиёев жорий йил январь ойида Туркияга расмий ташрифи чоғида Ҳатай вилоятининг Арсуз туманида “Ўзбекистон” турар-жой мажмуасининг очилиш маросимида туркиялик қардошларни, хусусан, Ҳатай аҳолиси вакилларини юртимизга саёҳат ва Наврўз байрамига таклиф этган эди.
Ушбу ташаббус доирасида меҳмонлар учун Андижон–Самарқанд–Хива йўналиши бўйлаб 5 кунлик саёҳат дастури ташкил этилган.
