Жанубий Кореядаги йирик ёнғинда ўзбекистонликлар жабрланмагани маълум қилинди
Ҳозирда вазият Ўзбекистон ТИВ томонидан назоратга олинган.
Дэчжон шаҳридаги автомобил эҳтиёт қисмлари ишлаб чиқариладиган заводда юз берган йирик ёнғин оқибатида ҳалок бўлганлар ёки жароҳатланганлар орасида Ўзбекистон фуқаролари йўқлиги маълум қилинди. Бу ҳақда Ташқи ишлар вазирлиги хабар берди.
Маълум қилинишича, ёнғин 20 март куни содир бўлган. Табиий офат кўлами жуда катта бўлгани сабабли Жанубий Корея Миллий ёнғин хизмати агентлиги томонидан миллий сафарбарлик буйруғи эълон қилинган. Ушбу чоралар одатда ҳудудий ресурслар ёнғинни бартараф этиш ва қутқарув ишларини олиб бориш учун етарли бўлмаганида қўлланади.
Ҳозирда вазият Ўзбекистон ТИВ Консуллик-ҳуқуқий департаменти томонидан доимий назоратга олинган. Шунингдек, Кореядаги Ўзбекистон дипломатик ваколатхонаси орқали тегишли маҳаллий идоралар билан яқин ҳамкорликда ишлар олиб борилмоқда.
Зарурият туғилган тақдирда, фуқаролар Ўзбекистон элчихонасига фавқулодда телефон рақамлари ёки электрон почта манзиллари орқали мурожаат қилишлари мумкин.
