Аҳоли 2025 йилда хорижий валютанинг 41 фоизини онлайн тарзда айирбошлаган — Марказий банк
Бу кўрсаткич 2024 йилга нисбатан 8,1 миллиард долларга ошган.
2025 йилда Ўзбекистонда аҳоли ва тижорат банклари ўртасида жами 33,6 миллиард доллар эквивалентида хорижий валюта олди-сотди операциялари амалга оширилди. Бу ҳақда Марказий банк маълум қилди.
Бу кўрсаткич 2024 йилга нисбатан 8,1 миллиард долларга ёки 32 фоизга ошган.
Таҳлилга кўра, ўтган йили банклар жисмоний шахслардан 21,6 миллиард доллар миқдорида хорижий валюта харид қилган бўлиб, бу йил давомида 34 фоизлик ўсишни кўрсатган.
Шу билан бирга, аҳолига 12 миллиард доллар миқдорида валюта сотилган (ўсиш — 27 фоиз).
Валюта айирбошлаш операцияларининг асосий қисми анъанавий шохобчалар орқали амалга оширилган — 19,3 миллиард доллар ёки жами ҳажмнинг 57 фоизи.
Масофавий хизматлар орқали амалга оширилган операциялар 13,8 миллиард долларни ташкил этиб, улуши 41 фоизга етган ва бу йўналишда 43 фоизлик ўсиш қайд этилган. Қолган 574 миллион доллар эса 24/7 режимда ишловчи банкоматлар орқали айирбошланган.
Марказий банк қайд этишича, онлайн хизматлар ва тун-у кун фаолият юритувчи валюта банкоматлари орқали операциялар улуши изчил ортиб бормоқда. Бу эса аҳолининг рақамли банк хизматларидан фойдаланиш даражаси кенгаяётганини кўрсатади.
Шунингдек, банклар томонидан жисмоний шахслардан сотиб олинган хорижий валюта ҳажми уларга сотилган валютага нисбатан 9,7 миллиард долларга кўп бўлган. Бу ҳолат ички валюта бозорида қўшимча таклиф шаклланишига хизмат қилиб, валюта мувозанатини таъминлашда муҳим омил сифатида баҳоланмоқда.
