АҚШ Эрон билан урушни 9 апрелгача тугатмоқчи — ОАВ
Музокаралар яқин кунларда Покистонда давом этиши кутилмоқда.
Ynet портали хабар беришича, АҚШ Эрон билан давом этаётган можарони 9 апрелга қадар якунлашни режалаштирмоқда. Нашр маълумотига кўра, бу ҳақда исми ошкор этилмаган исроиллик расмий маълум қилган.
Манбага кўра, Доналд Трамп бошчилигидаги Вашингтон можарони тугатиш учун айнан 9 апрел санасини мақсадли муддат сифатида белгилаган. Шу сабабли ҳозирги босқичда ҳарбий ҳаракатлар ва дипломатик музокаралар учун тахминан уч ҳафта вақт қолаётгани қайд этилган.
Шунингдек, расмий манба АҚШ ва Эрон ўртасидаги навбатдаги музокаралар шу ҳафта охирида Покистон ҳудудида ўтказилиши кутилаётганини билдирган.
Таъкидланишича, можарони 9 апрелгача якунлаш Доналд Трампга Исроилнинг Мустақиллик куни тадбирларида иштирок этиш ва давлат мукофотини қабул қилиш учун мамлакатга ташриф буюриш имконини бериши мумкин.
Аввалроқ Трамп сўнгги кунларда Эрон вакиллари билан музокаралар ўтказилганини маълум қилиб, АҚШ ҳарбийларига Эроннинг энергетика инфратузилмасига зарбаларни вақтинча тўхтатиш бўйича топшириқ берганини билдирган эди.
