Бухорода она ўғлининг алимент қарзини тўлаб берди
Маълум бўлишича, эркакнинг 2 та ижро ҳужжати бўйича 20 млн қарзи бўлган.
Бухоро вилоятининг Ғиждувон туманида она ўғлининг алимент қарзини тўлаб берди. Бу ҳақида МИБ ахборот хизмати Zamon.uz'га маълум қилди.
Қайд этилишича, ҳали ёш бўлишига қарамасдан, икки маротаба уйланиб, оиласидан ажрашишга улгурган қарздор отадан вояга етмаган фарзандлари моддий таъминоти учун алимент ундириш белгиланган.
Қарздор огоҳлантирилган бўлишига қарамасдан, алимент тўловини пайсалга солиб келган ва натижада ҳар иккала ижро ҳужжатлари бўйича 20 млн сўмлик қарздорлик юзага келган.
Ижро ҳаракатлари давомида қарздор номида бўлган автомашинага қидирув эълон қилинган. Автомашина топилиб, жарима майдончасига жойлаштирилгандан сўнг қарздорнинг онаси ўғлининг 20 млн сўмлик алимент қарздорлигини тўлаб беришга мажбур бўлган.
