Президент Янги Тошкентда қуриладиган мусиқали фаввора лойиҳаси билан танишди
Мажмуада 232 метр баландликка сув отадиган супер фаввора ва 360 даражали сув экрани барпо этилади.
Президент Шавкат Мирзиёев Янги Тошкент шаҳрида барпо этиладиган замонавий мусиқали фаввора мажмуаси лойиҳаси билан танишди.
Мажмуа Янги Тошкентда қарийб 8 гектар майдонни эгаллайди ва унда сув, мусиқа ва ёруғлик уйғунлигидаги шоуларни ўтказиш имконига эга фаввора барпо этилади. Лойиҳа доирасида 232 метр баландликка сув отадиган супер фаввора, 100 метр диаметрили сўзувчи платформа ва 360 даражали сув экралини ҳосил қиладиган фаввора қурилиши кўзда тутилган. Сув ҳавзаси атрофида яшил ҳудудлар, хизмат кўрсатиш объектлари ва визуал эффектлар билан жиҳозланган маскан барпо этилади.
Давлат раҳбари лойиҳанинг техник ечимлари, ҳудудни комплекс ободонлаштириш ва ташриф буюрувчилар учун савдо-овқатланиш ҳамда сервис хизматларини сифатли ташкил этиш масалаларига алоҳида эътибор қаратди. Шу билан бирга, Мустақиллик байрами тадбирлари юқори савияда ўтказилиши таъкидланди.
Мазкур мажмуа Янги Тошкентнинг диққатга сазовор масканларидан бирига айланиши ва шаҳарнинг меъморий қиёфасини бойитиши кутилмоқда.
