“Сирдарё” чегара божхона пости орқали Қозоғистонга ўтиш қайта тикланди
Ўзбекистон–Қозоғистон давлат чегарасидаги “Атамекен” чегара божхона постида қурилиш ишлари якунланди.
Сирдарё вилоятидаги “Сирдарё” чегара божхона пости орқали енгил автомобиллар ва фуқаролар ҳаракати тикланди. Бу ҳақда Божхона қўмитаси хабар берди.
Маълум қилинишича, Ўзбекистон–Қозоғистон давлат чегарасидаги “Атамекен” чегара божхона постида қурилиш ишлари якунлангани муносабати билан мазкур чегара постидан ўтишга рухсат берилди.
Эндиликда чегара орқали ўтиш жараёнлари соддалаштирилиб, фуқаролар учун қулай ва тезкор ҳаракатланиш имконияти яратилди.
Шунингдек, чегара хизматлари фуқаролардан пост орқали ҳаракатланишда белгиланган тартиб-қоидаларга қатъий риоя қилишни сўрамоқда.
