Сурхондарёда чегара қўшинларига ишга жойлаштиришни ваъда қилган сохта “прокурор” қўлга олинди
У фуқародан 1000 доллар талаб қилган ва пулни олаётган пайтда қўлга олинган.
Сурхондарё вилоятида ўзини давлат хизматчиси сифатида таништириб, фуқарони алдаш орқали пул олишга уринган шахс қўлга олинди. Бу ҳақда Бош прокуратура матбуот хизмати хабар берди.
Тергов маълумотларига кўра, фуқаро ўзини Бош прокуратура департаменти ходими сифатида таништириб, гўёки Давлат хавфсизлик хизмати Чегара қўшинларидаги мансабдор шахслар билан алоқаси борлигини билдирган. У мурожаатчига шартнома асосида ҳарбий хизматга жойлаштириб беришни ваъда қилиб, бунинг эвазига 1000 АҚШ доллари миқдорида пул талаб қилган.
21 март куни ўтказилган тезкор тадбир давомида мазкур шахс келишилган пул маблағларини олаётган вақтда ашёвий далиллар билан қўлга олинган. Ўша пайтда у 12,2 миллион сўм миқдоридаги пулни қабул қилган.
Мазкур ҳолат юзасидан гумонланувчига нисбатан Жиноят кодексининг 168-моддаси ҳамда 211-моддаси бўйича жиноий иш қўзғатилди.
Тергов жараёнида ушбу шахс ҳеч қачон бирор давлат идорасида, жумладан Бош прокуратура департаментида ҳам ишламаганлиги аниқланган.
Бош прокуратура фуқароларни ўзини давлат хизматчиси сифатида таништириб, ишга жойлаштириш ёки бошқа хизматлар учун пул талаб қиладиган шахсларга ишонмасликка ҳамда бундай ҳолатлар юз берганда тегишли ҳуқуқни муҳофаза қилувчи органларга мурожаат қилишга чақирди.
