Яқин Шарқдаги 23 кунлик можаро давомида 2100 дан ортиқ бола ҳалок бўлди ёки жароҳат олди — БМТ
Пентагоннинг маълумотига кўра, АҚШ Эрондаги 9000 нишонга зарба берган.
Бирлашган Миллатлар Ташкилотининг Болалар жамғарма директори ўринбосари Тед Чайбаннинг маълум қилишича, Яқин Шарқда 23 кундан бери давом этган можаро натижасида камида 2100 бола ҳалок бўлган ёки жароҳат олган. Шу давр мобайнида Эронда 206, Ливанда 118 бола вафот этган, Исроилда тўрта ва Қувайтда эса битта бола ҳалок бўлган.
Чайбаннинг таъкидлашича, уруш бошланганидан бери ҳар куни ўртача 87 бола жароҳат олган ёки ўлдирилган. “Минтақадаги болалар можароннг даҳшатли таъсирини бошдан кечирмоқда. Агар жанглар давом этса, қурбонлар ва яраланганлар сони ориши мумкин”, деди у.
БМТ маълумотларига кўра, жанговар ҳаракатлар натижасида болалар фаровонлиги учун муҳим бўлган уйлар, мактаблар, касалхоналар ва бошқа инфратузилма вайрон бўлган ёки жиддий шикастланган.
Пентагон томонидан берилган маълумотларга кўра, АҚШ Эрондаги 9000 та нишонга зарба берган ва Эроннинг 140 та кемасига зарар етказган ёки уларни вайрон қилганини даъво қилмоқда. Аввалроқ, Дональд Трамп 9 апрелни Эронга қарши ҳарбий операциянинг тугаш санаси сифатида белгилашни режалаштираётгани хабар қилинган эди.
Шу билан бирга, Беньямин Нетаняху билвосита Эрон билан келишувни тасдиқлади, аммо Исроил бир кун олдин Теҳрон ва Урмиядаги ҳудудларни бомбардимон қилган. Зарба турар-жой ҳудудларига тушган, Эрон ҳарбийлари эса ўз суверенитетини ҳимоя қилиш чораларини кўрмоқда.
Жорий можаро 28 феврал куни АҚШ ва Исроил томонидан Эрондаги нишонларга зарба бериш билан бошланган. Эрон эса бунга жавобан Исроил ҳудуди ва Яқин Шарқдаги АҚШ ҳарбий объектларига жавоб зарбаларини берди.
