Янги Тошкентда ФИФА талабларига мос 55 минг ўринли замонавий стадион қурилмоқда

Шавкат Мирзиёев 24 март куни Янги Тошкент ҳудудида барпо этилаётган йирик спорт иншооти — замонавий футбол стадионининг қурилиш жараёни билан танишди.

 

Мазкур спорт мажмуасига 2025 йил 11 ноябрь куни давлат раҳбари томонидан тамал тоши қўйилган эди. Ҳозирда стадион қурилиши жадал суръатларда олиб борилмоқда.

 

Жумладан, ҳудудни текислаш ишлари тўлиқ якунланган, пойдевор қуйиш жараёнлари эса қарийб 95 фоизга бажарилган. Қурилиш майдонига металл конструкциялар босқичма-босқич етказиб берилмоқда.

 

Сўнгги йилларда мамлакатда футбол инфратузилмасини ривожлантириш бўйича кенг кўламли ишлар амалга оширилмоқда. Хусусан, маҳаллий чемпионатлар тизими ислоҳ қилиниб, болалар ва ўсмирлар футбол академиялари ташкил этилди. Ҳозирда ҳудудларда 75 та катта ва 302 та мини стадион фаолият юритмоқда.

 

2017 йилда мамлакатда ФИФА ҳамда Осиё футбол конфедерацияси талабларига жавоб берадиган стадионлар сони атиги 3 та бўлган бўлса, бугунги кунда уларнинг сони 10 тадан ошди. Бундан ташқари, 1,5 мингдан ортиқ мактаб стадионлари таъмирланиб, 1 миллиондан зиёд ўқувчи ва маҳалла ёшлари спорт билан шуғулланиш имкониятига эга бўлди.

 

Ушбу саъй-ҳаракатлар натижасида мамлакат футболида сезиларли ютуқлар кузатилмоқда. Жумладан, Ўзбекистон олимпия терма жамоаси илк бор Париж Олимпиадаси–2024 мусобақаларида иштирок этди. Шунингдек, миллий терма жамоа тарихда илк бор жорий йилда бўлиб ўтадиган ФИФА Жаҳон чемпионати йўлланмасини қўлга киритди.

 

2024 йил 2 октябрь куни ФИФА Кенгаши йиғилишида 20 ёшгача бўлганлар ўртасидаги 2027 йилги жаҳон чемпионатини Ўзбекистон ва Озарбайжонда ўтказиш тўғрисида қарор қабул қилинган эди.

 

Айнан шу мусобақа талабларига мос равишда барпо этилаётган Янги Тошкент стадиони мамлакат футболы учун муҳим лойиҳа ҳисобланади. Қиймати қарийб 100 миллион доллар бўлган ушбу иншоот Осиёдаги энг замонавий футбол мажмуаларидан бирига айланиши кутилмоқда.

 

55 минг томошабинга мўлжалланган стадион 6 қаватдан иборат бўлади. Унда спортчилар, мухлислар ва матбуот вакиллари учун кенг имкониятлар яратилади. Томошабинлар учун тезкор кириш-чиқишни таъминлаш мақсадида ўндан ортиқ эскалатор ўрнатилиши режалаштирилган.

 

Мажмуа ҳудудида яна 3 та қўшимча машғулот майдони қурилади. Стадион яқинида метро бекати ҳамда 5 минг 500 ўринли автотураргоҳ барпо этилиши кўзда тутилган.

 

Давлат раҳбари бундай катта сиғимли ёпиқ стадион мамлакатда илк бор барпо этилаётганини таъкидлаб, қурилишда ҳар бир жиҳатга алоҳида эътибор қаратиш зарурлигини қайд этди. Шунингдек, стадион атрофини ободонлаштириш ишлари олдиндан режалаштирилиб, босқичма-босқич амалга оширилиши лозимлиги таъкидланди.