Ўзбекистон Президенти Шавкат Мирзиёев ва Россия Президенти Владимир Путин суҳбатлашди
Ўзбекистон ва Россия етакчилари икки томонлама ҳамкорлик масалаларини муҳокама қилди.
Ўзбекистон Президенти Шавкат Мирзиёев 24 март куни Россия Президенти Владимир Путин билан телефон орқали мулоқот қилди. Бу ҳақда Ўзбекистон Президентининг матбуот хизмати хабар берди.
Маълум қилинишича, телефон суҳбатида икки давлат ўртасидаги кенг қамровли стратегик шериклик ва иттифоқчилик муносабатларини ривожлантириш ва мустаҳкамлашнинг долзарб масалалари муҳокама қилинган.
“Савдо-иқтисодий ҳамкорликнинг жадал ривожланаётгани қайд этилди: ўтган йил якунларига кўра, товар айирбошлаш ҳажми 10 фоизга ошиб, 13 миллиард долларга етган, жорий йил бошидан эса яна 32 фоизга кўпайган. Саноат, энергетика, транспорт ва бошқа устувор тармоқларда йирик кооперация лойиҳалари амалга оширилмоқда”, дейилади хабарда.
Мулоқотда Ўзбекистонда биринчи атом электр станциясини қуриш лойиҳасига алоҳида эътибор қаратилган. Иқтисодий ҳамкорлик бўйича ҳукуматлараро қўшма комиссиянинг фаолияти самарали, деб баҳоланган.
Томонлар шунингдек, “ИННОПРОМ Марказий Осиё” халқаро саноат кўргазмасининг навбатдаги тадбирини жорий йил апрель ойида Тошкентда ўтказишга тайёргарлик кўраётганини таъкидлаган.
Шу билан бирга, Яқин Шарқ, Жанубий Осиё ва Украинадаги вазият каби халқаро аҳамиятга молик масалалар юзасидан фикр алмашилиб, бўлажак тадбирлар режаси муҳокама қилинган.
