Ўзбекистонда олтин қуймалар нархи кескин пасайди
24 март ҳолатига кўра, бир грамм олтин нархи 1 801 200 сўмни ташкил этди.
Жаҳон бозорида олтин нархининг арзонлашиши фонида Ўзбекистонда ҳам олтин қуймалар қиймати пасайди. Бу ҳақда Ўзбекистон Марказий банки маълум қилди.
24 март ҳолатига кўра, бир грамм олтин нархи 1 801 200 сўмни ташкил этди. Шунингдек, 5 граммли олтин қуйма нархи 9 миллион сўм атрофига тушган.
Марказий банк томонидан белгиланган янги нархлар қуйидагича:
• 5 грамм — 9 млн 6 минг сўм;
• 10 грамм — 18 млн 13 минг сўм;
• 20 грамм — 36 млн 25 минг сўм;
• 50 грамм — 90 млн 63 минг сўм;
• 100 грамм — 180 млн 126 минг сўм;
Шу билан бирга, олтин қуймаларни қайта сотиб олиш нархлари уларнинг қадоғи бутлиги ёки техник талабларга мослигига қараб белгиланади.
Маълумот учун, 26 январь куни 5 граммли олтин қуйма нархи илк бор 10 миллион сўмдан ошган эди. 29 январь куни эса у кетма-кет саккизинчи бор рекорд ўрнатиб, 10,8 миллион сўмдан юқори кўтарилган. Кейинчалик нархлар пасайишни бошлаган.
Жаҳон бозорида ҳам олтин арзонлашмоқда. 23 март куни COMEX биржасида олтин фьючерслари нархи 2025 йил 9 декабрдан бери илк бор бир унцияси учун 4,2 минг доллардан пастлади. 24 март ҳолатига кўра, ушбу кўрсаткич 4,3 минг доллар атрофида бўлган.
