2030 йилгача ҳаво ифлосланиши кескин камайтирилади
“Тоза ҳаво” лойиҳаси доирасида атмосферани муҳофаза қилиш бўйича чоралар кучайтирилмоқда.
Ўзбекистонда “Тоза ҳаво” умумхалқ лойиҳаси доирасида атмосфера ҳавосининг ифлосланишини камайтиришга қаратилган қатор вазифалар амалга оширилмоқда.
Маълумотларга кўра, бугунги кунда пойтахт ҳамда Навоий, Фарғона, Чирчиқ ва Термиз шаҳарларида ҳаво ифлосланиш даражасининг белгиланган меъёрлардан ошишига бир қатор омиллар сабаб бўлмоқда. Улар орасида саноатнинг жадал ривожланиши, углерод ёқилғиларидан кенг фойдаланиш, транспорт воситалари сонининг ортиши, табиий омиллар ва назоратнинг етарли эмаслиги қайд этилган.
Шу муносабат билан 2030 йилга қадар атмосферага чиқарилаётган ифлослантирувчи моддалар ҳажмини қисқартириш, саноат корхоналарида зарарли ташламаларни ушлаб қолиш даражасини ошириш, транспортдан чиқадиган чиқиндиларни камайтириш ҳамда ПМ2,5 кўрсаткичлари бўйича меъёр ошган кунлар сонини қисқартириш муҳим вазифалар сифатида белгиланган.
Лойиҳа доирасида, айниқса, энергетика ва саноат тармоқларига алоҳида эътибор қаратилмоқда. Шу билан бирга, қурилиш соҳасида ҳам экологик талаблар кучайтирилмоқда.
Эндиликда йирик қурилиш объектларини лойиҳалаштиришда кўкаламзорлаштириш даражасини ошириш, қурилиш материалларини ёпиқ шароитда сақлаш, чиқиндиларни махсус қувурлар ва контейнерлар орқали олиб чиқиш, ҳудудларни ҳимоя тўсиқлари билан ўраш ҳамда онлайн кузатув камераларини ўрнатиш каби мажбурий талаблар жорий этилмоқда.
Таъкидланишича, мазкур чора-тадбирлар нафақат экологик барқарорликни таъминлаш, балки атмосфера ҳавоси тозалигини яхшилаш, аҳоли саломатлигини муҳофаза қилиш ҳамда шаҳар инфратузилмасининг уйғун ривожланишига хизмат қилади.
