АҚШ Эронга Яқин Шарқдаги урушни тугатиш бўйича 15 банддан иборат режа юборди
Теҳрон АҚШнинг махсус вакиллари Стив Уиткофф ва Жаред Кушнер билан музокара ўтказишни рад этди, уларни “орқадан пичоқ урганликда” айблади.
Америка Қўшма Штатлари Эронга Яқин Шарқдаги урушни тугатиш учун 15 бандли режа юборган. Бу ҳақда The New York Times манбаларга таяниб хабар бермоқда.
Қайд этилишича, режа Трамп маъмуриятининг урушдан чиқиш йўлини топишга бўлган интилишини акс эттиради, чунки урушнинг иқтисодий оқибатлари сезилмоқда.
Расмийлар режа Покистон орқали етказилганини ва Покистон Бош штаб раиси Мунир АҚШ ва Эрон ўртасида асосий воситачи сифатида фаолият юритаётганини билдирган.
Нашрга кўра, Миср ва Туркия Эронни конструктив муносабатга чақирган. Мунирнинг Эроннинг Ислом инқилоби қўриқлари корпуси билан яқин алоқалари мавжуд бўлиб, у тарафлар ўртасида хабарларни етказишда воситачи вазифасини бажаради.
Режанинг мазмуни Эроннинг баллистик ракета ва ядровий дастурларини назарда тутади. Исроил ва АҚШ 28 февралдан бошланган бомбардимон кампанияси давомида Эроннинг ракеталари, уларни учириш қурилмалари ва ишлаб чиқариш иншоотлари ҳамда ядровий дастурини нишонга олган. Америка ва Исроил раҳбарлари Эроннинг ядровий қуролга эга бўлишига йўл қўймасликка ваъда берган.
Режа денгиз йўлларини ҳам қамраб олади. Чунки уруш бошидан бери Эрон деярли барча Ғарб кемаларининг Ҳўрмуз бўғозидан хавфсиз ўтишига тўсқинлик қилмоқда. Бу стратегик сув йўли орқали Жаҳон бозорига нефть ва табиий газ етказиб бериш қисқарган ва нархлар ошган.
Бироқ The Telgraph'нинг манбаларга таяниб хабар беришича, Эрон томони февраль ойида бўлиб ўтган музокаралардан сўнг Теҳрон нишонга олингани сабабли Уиткофф ва Кушнер билан юзма-юз музокара ўтказишни истамаяпти.
Шунингдек, агар ҳафтанинг охирида Покистонда янги музокаралар бошланса, бош музокарачиси сифатида АҚШ витсе- президенти Жей Ди Венс кўрилмоқда.
Манбаларнинг билдиришича, Эрон ҳам Венсе билан ишлашни афзал кўрмоқда, чунки у ваъдасига содиқ қолади деб ҳисобланмоқда.
