Ғазода 18 ойлик бола Исроил ҳарбийлари томонидан қийноққа солинди
Тиббий текширувлар боланинг оёғига сигарет босилганини ва металл буюм билан жароҳат етказилганини кўрсатган.
Ғазода 18 ойлик фаластинлик бола отасининг ҳибсга олиниши вақтида Исроил кучлари томонидан қийноққа солинган. Бу ҳақда Al Jazeera хабар берди.
Тиббий текширувлар боланинг оёғига сигарет босилгани ва металл буюм билан жароҳат етказилгани ҳақида маълумот берди.
Хабарларга кўра, Исроил аскарлари Усама Абу Нассар исмли эркакни ҳибсга олган ва сўроқ жараёнида унинг фарзандини кўз ўнгида қийноққа солган. Боланинг онаси ҳарбийлар Карим исмли ўғлининг оёғига сигарет босиб ўчиргани ва металл буюм санчганини билдирган.
Бола тахминан 10 соатдан сўнг озод этилиб, Қизил Хоч жамияти орқали Мағози ҳудудида оиласига топширилган. Боланинг отаси ҳибсда қолмоқда.
Исроил ҳарбийлари айбловларни рад этиб, воқеа 19 март куни “Сариқ чизиқ” ҳудудида содир бўлганини билдирган. Уларнинг таъкидлашича, уч ёшли боланинг отаси бўлган шахс ҳарбийлар огоҳлантиришига қарамай ҳаракат қилган ва улар йўл четига огоҳлантирувчи ўқ узган.
Ҳарбийлар баёнотида, боланинг жароҳат олиши эҳтимол отишма оқибатида сачраган парчалар билан боғлиқлиги айтилган. Шунингдек, бола сўроқ жараёнида тиббий кўрикдан ўтказилиб, озиқ-овқат ва сув билан таъминланган, сўнгра Қизил Хоч жамияти вакилларига топширилган.
Исроил ҳарбийлари ҳибсга олинган шахс ўзини ҲАМАС аъзоси сифатида таништириб, 7 октябрь воқеалари вақтида Исроил ҳудудига кирганини тан олганидан сўнг ҳибсга олинганини билдирган.
