Эндиликда Ўзбекистон аҳолиси фавқулодда вазиятлар ҳақида масжидлар орқали огоҳлантирилади

Бирлашган Миллатлар Ташкилоти Тараққиёт Дастури (БМТТД) Фавқулодда вазиятлар вазирлиги (ФВВ) билан ҳамкорликда Ўзбекистон аҳолисини табиий офатлар ва фавқулодда вазиятларда тезкор огоҳлантириш имконини берувчи инновацион техник ечимни жорий этди.

 

Лойиҳа доирасида аҳоли пунктларига яқин жойлашган масжидларга махсус ускуналар ўрнатилди. Эндиликда ФВВнинг фавқулодда хабарлари масжидларнинг ташқи овоз кучайтиргичлари орқали тарқатилади ва ахборот тезкор равишда кенг жамоатчиликка етказилади. 

 

Маълум қилинишича, бугунги кунга қадар Жиззах, Қашқадарё, Наманган, Самарқанд, Сирдарё, Тошкент ва Фарғона вилоятларидаги 272 та масжидда ушбу ускуналар ўрнатилган.

 

Масжидлар маҳаллий аҳоли орасида нуфузли ижтимоий институт сифатида эътиборга молик ва деярли барча аҳоли пунктларида жойлашган бўлиб, бинодаги юқори қувватли ташқи овоз кучайтиргичлар ёрдамида огоҳлантириш 500 метрдан 2 километргача эшитилиш радиусини таъминлайди.

 

Лойиҳа ҳисоб-китобларига кўра, бу орқали тахминан 6,5 миллион нафар аҳоли, жумладан аёллар, эркаклар, болалар ва заиф қатламлар қамраб олинади.

 

Ушбу тизим билан мобил алоқа ёки электр таъминотида узилишлар юзага келганда ҳам тезкор хабарларни узатиш мумкин. 

 

Шунингдек, БМТТД ва Яшил иқлим жамғармаси молиявий кўмагида аҳолини огоҳлантириш мақсадида мамлакатдаги асосий автомобиль йўллари бўйлаб ва гавжум жойларда 28 та ташқи кенг форматли экран ҳам ўрнатилди.

 

БМТТД, ФВВ ва Ўзгидрометнинг “Ўзбекистон аҳолисининг иқлим ўзгариши натижасида юзага келадиган хавф-хатарларга нисбатан чидамлилигини оширишга қаратилган комплекс эрта огоҳлантириш тизимини такомиллаштириш” номли қўшма лойиҳаси Яшил иқлим жамғармаси томонидан молиялаштирилади.

 

 Лойиҳа айниқса сув тошқинлари, селлар, кўчкилар, қор кўчкилари ва гидрологик қурғоқчилик каби табиий офатлар хавфи юқори бўлган тоғли ҳудудларда аҳолини эрта огоҳлантириш тизимини модернизация қилиш ва такомиллаштиришга қаратилган.