“Ислом цивилизациясига замонавий қарашни шакллантирадиган макон”

Ўзбекистонда очилган Ислом цивилизацияси маркази халқаро оммавий ахборот воситалари диққат марказига айланди. 

 

Қайд этилишича, жаҳоннинг етакчи нашрлари — CNN, Forbes, The Wall Street Journal, Тҳе Economist, Arab News ва China Daily — лойиҳани “глобал миқёсдаги мегалойиҳа” ва “Марказий Осиёнинг муҳим маданий маркази”, “Марказий Осиё дурдонаси” ҳамда “ислом цивилизациясига замонавий қарашни шакллантирадиган макон” сифатида баҳоламоқда.

 

Марказ ҳақидаги материаллар 20 дан ортиқ давлатда ва 7 тилда — инглиз, араб, испан, хитой, ҳинд, турк ва рус тилларида чоп этилди. Ушбу хабарлар халқаро журналистлар ва экспертлар томонидан тайёрланган бўлиб, лойиҳага нисбатан кенг аудиториянинг қизиқишини акс эттиради.

 

Халқаро нашрлар марказнинг замонавий илмий ёндашувлар ва технологиялар билан бойитилганлигига эътибор қаратмоқда. Arab News Марказнинг очилиши муқаддас Рамазон ойига тўғри келганини таъкидласа, Khaleej Times уни “ноёб ва замонавий макон” сифатида баҳолайди. Forbes эса лойиҳани Ўзбекистоннинг иқтисодий ва маданий ривожланиш стратегияси доирасида амалга оширилгани билан боғлайди.

 

The Wall Street Journal ва China Daily Марказнинг    асраб-авайлаш ва халқаро ҳамкорликда маданий-гуманитар алмашинувга қўшган ҳиссасига эътибор қаратмоқда. The Korea Times ва Euronews Марказни илмий тадқиқотлар, таълим ва кўргазма фаолиятини бирлаштирган “замонавий тадқиқот ва мерос хаби” сифатида баҳолашган.

 

Шунингдек, Европа ва Осиё нашрлари марказнинг архитектураси ва барқарорлик стандартлари, шунингдек тарихий ва маданий меросни сақлашдаги ўрнини қайд этмоқда. Caliber.az эса уни “Гиннес рекордлар китобига номзод” сифатида кўрсатган.

 

Ислом цивилизацияси маркази нафақат музей сифатида, балки мамлакатнинг маданий ва тарихи меросини кенг аудиторияга тақдим этувчи макон сифатида ҳам аҳамиятли эканлиги таъкидланмоқда. Марказ нафақат туристик диққатни жалб қилишда, балки маданий ва илмий ҳамкорликни ривожлантиришда ҳам муҳим аҳамиятга эга.