Италиялик миллиардер Ҳўрмуз бўғози ёпилиши фонида катта бойлик орттирди

Италиялик миллиардер Жанлуижи Апонте, бойлиги 44,5 миллиард долларга баҳоланадиган MSC контейнер ташиш компанияси ҳаммуассиси, воситачи компаниялар орқали ўнлаб супертанкерларни сотиб олиб, йирик флот шакллантиргани маълум бўлди.

 

Forbes нашри хабарига кўра, нефть нархларининг кўтарилиши ва Ҳормуз бўғозининг блокадаси билан боғлиқ вазият туфайли Апонте юк ташиш бозорини монополлаштириши мумкин.

 

Қайд этилишича, Aponte Жанубий Кореянинг Sinokor Merchant Marine компанияси орқали амалга оширилган битимлар ортида туради. Ушбу компания декабрь ойидан бошлаб хом нефть ташиш учун мўлжалланган жуда катта танкерлар (VLCC)ни фаол равишда сотиб олишни бошлаган. Март ойига келиб камида 60 та кема 3,3 миллиард долларга харид қилинган.

 

Маълумотларга кўра, харид қилинган 31 та танкер Haut Brion номи остидаги компанияларда рўйхатдан ўтказилган бўлиб, уларнинг 11 тасига миллиардернинг амакиваччаси Марио Апонте раҳбарлик қилади. Яна 20 та танкер Либерияда рўйхатдан ўтказилган ва уларнинг эгалари яширилган.

 

Агар ушбу активлар MSC билан боғлиқ экани тасдиқланса, Апонте декабрдан буён сотиб олинган кемаларнинг ярмидан кўпини назорат қилаётгани аниқ бўлади.

 

Forbes маълумотига кўра, Эрон можароси ва Ҳормуз бўғози билан боғлиқ вазият сабаб юк ташиш ставкалари рекорд даражага етган. Шу фонда Sinokor ва MSC умумий қиймати 6,7 миллиард долларга тенг камида 76 та супертанкерни назорат қилмоқда.

 

Оkeanis Ecо Tankers маълумотларига кўра, улар глобал танкер флотининг 17 фоизигача, спот бозордаги флотнинг эса 39 фоизигача қисмини назорат қилмоқда.

 

Forbes нашрига берган интервьюсида экспертлар миллиардернинг стратегиясини бозорни эгаллаб олиш ва бозор нархларини оширишга уриниш сифатида баҳоладилар.