Марказий банк ҳузурида Исломий молия кенгаши ташкил этилади

Шавкат Мирзиёев 25 март куни банк тизимида исломий молия механизмларини жорий этиш бўйича тақдимот билан танишди. Бу ҳақда Ўзбекистон Республикаси Президенти матбуот хизмати хабар берди.

 

Таъкидланишича, мамлакат банк тизимида исломий молия инструментларини босқичма-босқич жорий этиш режалаштирилмоқда. Жумладан, муробаҳа, музораба, вакала, салам ва истисно, мушорака ҳамда исломий ижара каби молиявий механизмларни амалиётга татбиқ этиш кўзда тутилган. Мазкур инструментлар орқали мижозларни турли шаклларда молиялаштириш, янги инвестицияларни жалб қилиш ҳамда молиявий хизматлар кўламини кенгайтириш имконияти яратилади.

 

Тақдимот давомида ушбу соҳада солиқ ва ҳуқуқий механизмларни такомиллаштириш масалалари ҳам муҳокама қилинди. Хусусан, сотилган товар устамасига қўшилган қиймат солиғи ҳисобланмаслиги, инвестициявий омонатлардан олинган даромадларни солиқдан озод қилиш, шунингдек, исломий ижара шартномаларини молиявий ижара ва лизинг билан тенглаштириш каби чора-тадбирлар назарда тутилмоқда.

 

Исломий молия тизимини тизимли равишда ривожлантириш мақсадида Ўзбекистон Республикаси Марказий банки ҳузурида Исломий молия кенгаши ташкил этилади. Шунингдек, исломий молия хизматларини кўрсатувчи банкларда ҳам алоҳида кенгашлар тузилиб, улар соҳада стандартлар ишлаб чиқиш, норматив-ҳуқуқий ҳужжатлар лойиҳаларини тайёрлаш ҳамда шариат тамойилларига мувофиқлик устидан назоратни амалга оширади.

 

Режаларга кўра, жорий йилда камида битта тижорат банкида исломий молия хизматларини кўрсатадиган махсус “исломий дарча” фаолияти йўлга қўйилади. 2026–2030 йиллар давомида эса тўлиқ исломий банк фаолиятини амалга оширувчи камида иккита банк ташкил этиш кўзда тутилган.

 

Таъкидланишича, ушбу ислоҳотлар орқали 2026–2030 йилларда қўшимча 1 миллиард доллар миқдорида инвестиция ва депозитларни жалб этиш имконияти яратилади.

 

Шунингдек, йиғилишда 2026 йилда Тошкентда халқаро молия маркази ташкил этилиши режалаштирилаётгани ҳам маълум қилинди. Ҳисоб-китобларга кўра, 2030 йилгача ушбу марказ орқали иқтисодиётга 20–25 миллиард доллар миқдорида қўшимча инвестициялар жалб қилиш, ялпи ички маҳсулот ўсишига ҳар йили 1 фоизгача ҳисса қўшиш, шунингдек 15 мингтагача юқори малакали иш ўрни яратиш ҳамда 10 минг нафар мутахассиснинг малакасини ошириш имконияти мавжуд.