Президент Шавкат Мирзиёев нефть-газ тармоғидаги ишлар бўйича ҳисобот билан танишди

 

Шавкат Мирзиёевга нефть-газ тармоғида қазиб чиқариш ҳажмини барқарорлаштириш ва янги захираларни ўзлаштириш бўйича чора-тадбирлар ижроси юзасидан ахборот берилди.

 

«Ўзбекнефтгаз» тизимида табиий газ қазиб чиқариш динамикаси, мавжуд пасайиш омиллари ва уларни бартараф этиш чоралари ҳақида маълумот тақдим этилди. Жорий йилнинг биринчи чорагида янги қудуқлар ишга туширилиб, мавжудларини таъмирлаш ва технологик тадбирлар амалга оширилгани қайд этилди. Йил давомида бу ишлар янада кенгайтирилиши режалаштирилган.

 

Қудуқлар самарадорлигини ошириш учун замонавий технологияларни жорий этиш масаласига алоҳида эътибор қаратилди. Ҳозирда янги 2D ва 3D сейсмик тадқиқотлар учун истиқболли майдонлар аниқланмоқда. Бурғилаш ва дала ишлари устидан халқаро стандартлар асосида назоратни кучайтириш, геологик-гидродинамик моделлаштириш ва қазиб чиқариш дастурларини пухта шакллантириш бўйича чора-тадбирлар белгиланган.

 

Шунингдек, конларда газ қазиб олиш коэффитсиентини ошириш, қийин ўзлаштириладиган захираларга янги ёндашувларни татбиқ этиш, 2026–2027 йилларга мўлжалланган дастурларнинг иқтисодий самарадорлигини баҳолаш масалалари муҳокама қилинди. Бу борада халқаро компаниялар билан ҳамкорликда ишлар олиб борилаётгани қайд этилди.

 

Давлат раҳбари тармоқда ишлаб чиқариш барқарорлигини таъминлаш, мавжуд қувватлардан самарали фойдаланиш, геология-қидирув ва бурғилаш ишларини тизимли ташкил этиш, шунингдек, хорижий ҳамкорлар билан амалий натижа берадиган шерикликни кенгайтириш муҳимлигини таъкидлади.

 

Мутасаддиларга белгиланган режалар ижросини қаттиқ назоратга олиш ва ҳар бир йўналиш бўйича аниқ натижадорликни таъминлаш юзасидан топшириқлар берилди.