Тошкент вилоятида чиқинди хизматлари тарифлари 1 апрелдан оширилади
Қарорда бир нафар фуқаро учун ойига чиқинди тўлови 10 864 сўм этиб белгиланиши таклиф этилган.
Тошкент вилоятида 2026 йил 1 апрелдан маиший чиқиндиларни олиб чиқиш хизматлари учун тўлов тарифлари оширилади. Тегишли қарор Халқ депутатлари вилоят кенгаши томонидан қабул қилинди.
Қарорга кўра, ҳозирда бир нафар фуқаро учун ойига 7 840 сўм (ҚҚС билан) бўлган чиқинди тўлови 10 864 сўм этиб белгиланиши таклиф этилган. Юридик шахслар учун эса тариф 82 880 сўмдан 97 316 сўмга оширилади.
Шунингдек, 1 тонна қаттиқ маиший чиқиндини олиб чиқиш ва уни қайта юклаш станцияси ёки полигонларга етказиб бериш учун санитария-тозалаш корхоналарига тўланадиган ҳақ 482 842,08 сўмни (ҚҚС билан) ташкил этади. 1 куб метр чиқинди учун эса ушбу хизмат нархи 215 250,56 сўм (ҚҚС билан) этиб белгиланган.
Маълумот ўрнида, 2026 йил 1 январдан бошлаб чиқиндиларни олиб кетиш хизматлари учун тўловнинг янги тизими жорий этилган. Унга кўра, истеъмолчилардан фақат амалда кўрсатилган хизматлар учун ҳақ олинади ва барча ҳисоб-китоблар онлайн тизимлар орқали амалга оширилади.
