Тошкентда АҚШ визасини олиб бериш учун 75 минг доллар олган шахс ушланди
Шунингдек, Болгарияга ишга юбориш учун 3 минг доллар талаб қилган шахс ҳам қўлга олинган.
Бош прокуратура ҳузуридаги Департамент ва бошқа ҳуқуқни муҳофаза қилувчи органлар ҳамкорлигида олиб борилган тезкор тадбирлар натижасида хорижий давлатларга ишга юбориш билан боғлиқ бир қатор фирибгарлик ҳолатлари фош этилди.
Маълум қилинишича, Сергели туманида олиб борилган тадбирда Ш.А. фуқаро М.О.дан АҚШга “Бизнес” визасини расмийлаштириш учун 75 000 АҚШ долларини олган вақтида ушланган. Ушбу ҳолатда ашёвий далиллар ҳам топилган.
Шунингдек, Хатирчи туманида олиб борилган тезкор тадбирда “Т.Л.” МЧЖ раҳбари Ф.Ш. фуқаро Ж.Б.нинг ишончига кириб, уни Болгарияга юбориш ва ишга жойлаштириш эвазига 3 000 АҚШ долларини фирибгарлик йўли билан олган вақтда ушланган.
Мазкур ҳолатлар юзасидан Ўзбекистон Жиноят кодексининг 168-моддаси (фирибгарлик) ва 28 ҳамда 211-моддалари (пора бериш) бўйича жиноят ишлари қўзғатилди ва тергов ҳаракатлари олиб борилмоқда.
