Бангладешда автобус дарёга қулаши оқибатида 20 дан ортиқ киши ҳалок бўлди
Автобусда тахминан 40 нафар йўловчи бўлган.
Бангладешда йўловчи автобуси Падма дарёсига қулаши оқибатида камида 24 киши ҳалок бўлди. Бу ҳақда Reuters агентлиги маҳаллий расмийларга таяниб хабар берди.
Маълумотларга кўра, автобус мамлакат марказий ҳудудларидан бирида паромга чиқиш учун понтонда кутаётган пайтда назоратдан чиқиб кетиб, дарёга қулаган.
Дастлабки маълумотларга кўра, транспорт воситасида тахминан 40 нафар йўловчи бўлган.
Қутқарувчилар ҳодисадан бир неча соат ўтиб автобусни дарё тубидан чиқариб олишга муваффақ бўлишган.
Қидирув-қутқарув ишлари ёнғин хавфсизлиги хизмати, армия, полиция, қирғоқ қўриқлаш хизмати ҳамда маҳаллий маъмурият ҳамкорлигида олиб борилмоқда. Операцияда 10 нафар ғаввос иштирок этаётган тўртта махсус бўлинма жалб қилинган.
Расмийларга кўра, ҳалок бўлган 24 кишидан 23 нафарининг шахси аниқланган. Қурбонлар орасида аёллар ва болалар ҳам борлиги маълум қилинган.
