“Ғолибларга Damas ва пул мукофотлари берилади”

Мактабгача ва мактаб таълими вазирлиги томонидан қатор ҳамкор ташкилотлар билан биргаликда умумтаълим мактабларининг 7-11-синф ўқувчи-қизлари ўртасида футбол бўйича “Мактабгача ва мактаб таълими вазири кубоги” мусобақаси ўтказилмоқда. 

 

 

Қайд этилишича, бундан кўзланган асосий мақсад, ўқувчи-қизлар ўртасида оммавий футболни ривожлантириш, соғлом турмуш тарзини мустаҳкамлаш ҳамда иқтидорли спортчиларни аниқлашдан иборат.

 

Маълумот ўрнида: мусобақанинг туман (шаҳар) босқичида Ўзбекистон бўйлаб 5 020 та умумтаълим мактабидан жами 98 618 нафар ўқувчи-қиз иштирок этди. Умумий натижаларга кўра, ўз ҳудудларида етакчиликни қўлга киритган 16 та жамоа республика босқичига йўлланмани қўлга киритишди.

 

 

Айни дамда мусобақанинг Республика босқичи Сурхондарё вилоятида бўлиб ўтмоқда. Унда 14 та ҳудуддан жами 256 нафар ўқувчи-қиз ўзаро куч синашмоқда. 

 

Жараёнлар доирасида иштирокчи ўқувчи қизлар Сурхондарё вилоятининг тарихий биноларига уюштириладиган саёҳат тадбирларида ҳам қатнашишди.

 

Футбол баҳсларининг дастлабки саралаш босқичи 25-28 март кунлари вилоятнинг Ангор тумани марказий стадионида 4 та гуруҳга бўлинган ҳолда ўтказилмоқда. 

 

Финал баҳси ва тақдирлаш маросими 29 март куни Сурхон арена стадионида ташкил қилинади.

 

 

 “Мактабгача ва мактаб таълими вазири кубоги” мусобақаси республика босқичида:

 

1-ўринни қўлга киритган ғолиб жамоа аъзолари — “Дамас” автомашинаси ва 250 млн сўм;

 

2-ўринни қўлга киритган жамоа аъзолари — “Дамас” автомашинаси ва 200 млн сўм;

 

3-ўринни қўлга киритган жамоа аъзолари — “Дамас” автомашинаси ва 150 млн сўм пул мукофотлари билан тақдирланади.

 

Шунингдек, 13 та жамоа иштирокчиларига Спорт вазирлиги томонидан воркаут майдончасини қуриб бериш бўйича ваучер, Давлат хавфсизлик хизмати ва Ўзбекистон футбол асотсиатсияси томонидан 800 млн сўм қийматга эга футбол коптоклари тақдим этилади.