Қорақалпоғистонда алимент тўлашдан қочиб юрган эркак автобусдан топилди
Ҳозирда қарздорнинг алимент тўловларидан қарздорлиги 28 млн сўмни ташкил этиб, унинг жавобгарлик масаласи кўриб чиқилмоқда.
Қорақалпоғистон Республикасининг Беруний туманида алимент тўлашдан қочиб юрган эркак автобусдан топилди. Бу ҳақида МИБ ахборот хизмати Zamon.uz’га маълум қилди.
Қайд этилишича, Мажбурий ижро бюроси Беруний туман бўлими иш юритувида мавжуд бўлган, Фуқаролик ишлари бўйича Беруний туманлараро суднинг ижро ҳужжатига асосан ундирувчи Ж.Ч. фойдасига тарбиясидаги икки нафар фарзандлари таъминоти учун қарздор А.Ё.дан алимент ундириш белгиланган.
Қарздор томонидан алимент пуллари ҳар ой ўз вақтида тўлаб келинмаганлиги сабабли, ижро ҳужжати ижросини таъминлаш мақсадида, қарздорнинг яшаш манзилига бир неча маротаба борилганида, қарздор ушбу манзилда йўқлиги аниқланган.
Шу сабабли унга нисбатан Мажбурий ижро бюроси Беруний туман бўлими давлат ижрочиси томонидан қидирув эълон қилинган.
Мажбурий ижро бюроси Қорақалпоғистон Республикаси бошқармаси қидирув шуъбаси ходимлари томонидан қарздор Тўрткўл туманида иккинчи турмуш ўртоғининг уйида яшириниб, Беруний туманига келиб кетиб юрганлиги аниқланиб, қарздорни ушлаш режаси тузилган.
Жорий йилнинг 25 март куни қарздор Тўрткўл туманидан Тўрткўл-Беруний йўналишида қатновчи автобусга чиққан ва автобус тезкор ходимлар томонидан кузатиб борилган.
Автобус тузилган режа асосида Беруний туман марказида жойлашган бекатда тўхтаган пайтда қарздор бюронинг Беруний туман ходимлари билан биргаликда қўлга олинган.
Ҳозирда қарздорнинг алимент тўловларидан қарздорлиги 28 млн сўмни ташкил этиб, унинг жавобгарлик масаласи кўриб чиқилмоқда.
