Қозоғистон ғарбида дрон қулади
Дрон аҳоли яшаш пункти яқинидан топилган.
Ғарбий Қозоғистон вилоятининг Қараултобе қишлоғи яқинида маҳаллий аҳоли ерга қулаган учувчисиз аппаратни топди. Бу ҳақда Казинформ хабар берди.
Полиция маълумотига кўра, ҳозирда қишлоқ ҳудудида учувчисиз аппарат қолдиқларига ўхшаш буюмлар топилиши юзасидан текширув тадбирлари ўтказилмоқда. Мазкур объект аҳоли яшайдиган пункт ташқарисида топилган ва ҳодиса тафсилотлари ўрганилмоқда.
Бу ҳудудда бундай ҳолатлар илгари ҳам кузатилган. 2025 йил февраль–март ойларида Ғарбий Қозоғистоннинг бир нечта туманларида номаълум учувчисиз аппаратлар топилган. Шундан сўнг Қозоғистон Республикаси Мудофаа вазирлиги ҳаво ҳудудини назорат қилишни кучайтириш бўйича қўшимча чоралар кўрган.
Аввалроқ, Қозоғистон Мудофаа вазирлиги бу каби дронларнинг 90 фоиздан ортиғи Россия 926-бош учиш синов маркази полигон ҳудудига тўғри келишини билдирган. Ушбу ҳудуд ва унинг ҳаво майдони Россия томонидан синовлар учун фойдаланилади.
