Пентагон Эронга қарши “ҳал қилувчи зарба” сценарийларини ишлаб чиқмоқда

Пентагон Эронга қарши эҳтимолий ҳарбий операциялар бўйича бир нечта сценарийларни кўриб чиқмоқда. Бу ҳақда Axios нашри АҚШ расмий манбаларига таяниб хабар берди.

 

Нашр маълумотларига кўра, ишлаб чиқилаётган вариантлар қаторида қуруқликдаги қўшинлардан фойдаланиш, кенг кўламли бомбардимон ҳамда Форс кўрфазидаги стратегик ҳудудларни назоратга олиш каби чоралар мавжуд.

 

Манбаларнинг таъкидлашича, айрим АҚШ расмийлари бундай куч намойиши тинчлик музокараларида Вашингтоннинг позициясини мустаҳкамлаши ёки Дональд Трамп учун сиёсий жиҳатдан “ғалаба” эълон қилиш имконини бериши мумкин, деб ҳисобламоқда.

 

Хусусан, АҚШ томонидан кўриб чиқилаётган эҳтимолий ҳарбий сценарийлар орасида қуйидагилар бор:

 

Эроннинг асосий нефть экспорт марказларидан бири бўлган Харг оролига бостириб кириш ёки уни блокадага олиш;

 

Ларак оролини эгаллаш орқали Эроннинг Ҳормуз бўғози устидан назоратини чеклаш;

 

Стратегик аҳамиятга эга Абу Муса ороли ҳамда бўғоз яқинидаги яна икки кичик оролни назоратга олиш;

 

Ҳормуз бўғозининг шарқий қисмида Эрон нефтини ташиётган кемаларни тўсиб қўйиш ёки мусодара этиш.

 

Бундан ташқари, АҚШ ҳарбийлари Эрон ҳудудига чуқур киришни назарда тутувчи қуруқликдаги операция режаларини ҳам тайёрлагани айтиламоқда. Бироқ юқори хавф сабабли Оқ уй ҳозирча якуний қарор қабул қилмаган.

 

Хабар қилинишича, яқинда АҚШ Ҳарбий-ҳаво кучларининг C-17A Globemaster III транспорт самолёти БАА ҳудуди устида ҳарбий маневрлар ўтказган. Айрим таҳлилчилар буни эҳтимолий операцияга тайёргарлик сифатида баҳоламоқда.

 

Эслатиб ўтамиз, АҚШ ва Исроил 28 февралдан буён Эронга қарши ҳарбий операциялар олиб бормоқда. Можаро кучайиши натижасида глобал энергетика бозори учун муҳим бўлган Ҳормуз бўғози орқали юк ташиш деярли тўхтаб қолган.

 

Манбаларга кўра, агар Теҳрон билан музокаралар ижобий натижа бермаса, АҚШ раҳбарияти вазиятни кескинлаштириш эҳтимолини ҳам истисно қилмаяпти.