Россияда электрон сигаретлар бутунлай тақиқланиши мумкин
Давлат комиссияси электрон никотин етказиб бериш тизимларини тўлиқ тақиқлаш ташаббусини қўллаб-қувватлади.
Россияда электрон сигареталар, вейплар ҳамда улар учун мўлжалланган суюқликларни ишлаб чиқариш, импорт қилиш ва тарқатишни тўлиқ тақиқлаш ташаббуси илгари сурилди. Бу ҳақда Vedomosti нашри хабар берди.
Маълум қилинишича, ушбу таклиф саноат маҳсулотларининг ноқонуний айланишига қарши кураш бўйича давлат комиссияси йиғилишида қўллаб-қувватланган.
Йиғилиш якунлари бўйича мазкур масала юзасидан алоҳида қонун лойиҳаси ишлаб чиқилиши мумкин.
Нашр манбаларига кўра, давлат комиссияси томонидан маъқулланган ташаббуслар одатда кейинчалик қонунчилик даражасида ривожлантирилади ва тегишли ҳужжатлар шакллантирилади.
Дастлаб йиғилишда электрон никотин етказиб бериш тизимлари бозорида назоратни кучайтириш масаласи муҳокама қилиниши режалаштирилган эди. Бироқ муҳокамалар давомида иштирокчилар ушбу маҳсулотларни бутунлай тақиқлаш зарурлиги ҳақида якдил фикрга келишган.
Чекловлар татбиқ этиладиган қурилмалар рўйхати ҳамда қонун лойиҳасини ишлаб чиқувчи ташкилот кейинчалик аниқлаштирилиши маълум қилинди.
