Россияда нақд рубл ва олтин олиб чиқишга чекловлар жорий этилди
1 апрелдан бошлаб барча тоифадаги шахслар олиб чиқилаётган маблағларнинг келиб чиқишини банк ҳужжатлари билан тасдиқлаши керак бўлади.
Россия президенти Владимир Путин 25 март куни мамлакатдан нақд пул ва олтин олиб чиқишни тартибга солувчи янги фармонни имзолади.
Ҳужжатга кўра, бир қатор чекловлар 2026 йил 1 апрелдан кучга киради.
Янги тартибга биноан, жисмоний шахслар Евросиё иқтисодий иттифоқи (EИИ)га аъзо давлатлар — Арманистон, Беларус, Қозоғистон ва Қирғизистонга 100 минг АҚШ долларидан ортиқ қийматдаги нақд рублни олиб чиқолмайди.
Шу билан бирга, юридик шахслар ва якка тартибдаги тадбиркорлар учун нақд пулни темирйўл ёки автомобилда олиб чиқиш тўлиқ тақиқланади. Улар бундай операцияларни фақат халқаро аэропортлар орқали амалга ошириши мумкин бўлади.
Фармонга мувофиқ, 1 апрелдан бошлаб барча тоифадаги шахслар олиб чиқилаётган маблағларнинг келиб чиқишини банк ҳужжатлари билан тасдиқлаши, шунингдек, хорижда ундан қандай мақсадда фойдаланилишини кўрсатган ҳолда декларация топшириши шарт этиб белгиланди.
Бундан ташқари, ҳужжат билан олтин олиб чиқиш бўйича ҳам чекловлар жорий этилди. Хусусан, 2026 йил 1 майдан бошлаб оғирлиги 100 граммдан ортиқ бўлган олтин қуймаларини олиб чиқиш тартиби қатъийлаштирилади.
Юридик шахслар ва тадбиркорлар бундай қуймаларни EИИ давлатларига фақат Россия Асиллик палатасининг махсус рухсатномаси асосида ҳамда Шереметево, Домодедово, Внуково ва Кневичи халқаро аэропортлари орқали олиб чиқиши мумкин бўлади.
Жисмоний шахслар учун эса олтин олиб чиқиш бўйича янги талаблар нафақат EИИ мамлакатларига, балки бошқа хорижий давлатларга нисбатан ҳам амал қилади.
