Россиянинг дрон ҳужумлари оқибатида Украинада икки киши ҳалок бўлди
Дунай дарёси бўйидаги Измаил портига зарба берилиб, порт иншоотлари ва энергетика инфратузилмасига зарар етказилди.
Россия ҳужумлари Украинанинг шимоли-шарқидаги Харков шаҳрида ва унинг атрофида икки кишининг ҳалок бўлишига сабаб бўлди. Бу ҳақда расмийларга таяниб Reuters хабар бермоқда.
Маълум қилинишича, Дунай дарёси бўйидаги Измаил портига ҳам зарба берилган бўлиб, натижада порт иншоотлари ва энергетика инфратузилмасига зарар етган.
Харков вилояти прокуратураси пайшанба куни эрта тонгда Телеграмъда эълон қилган баёнотида, Харков шаҳрига қилинган ҳужумда жароҳатланган аёл шифохонада вафот этганини маълум қилди.
Хабарга кўра, Россия кучлари тез-тез нишонга оладиган, чегарадан 30 км узоқликда жойлашган шаҳарнинг икки туманига уюштирилган зарбалар натижасида яна тўққиз киши жароҳатланган.
Прокуратура, шунингдек, чегарага яқинроқ ҳудудда Россиянинг дрон ҳужуми оқибатида машинасида бўлган эркак ҳам ҳалок бўлганини билдирди.
Россиянинг Белгород вилояти губернатори Вячеслав Гладковнинг айтишича, Украинанинг дрон ҳужжумлари оқибатида чегарага яқин қишлоқда мотоциклда кетаётган 18 ёшли йигит ҳамда Грайворон шаҳрида машинасидаги аёл вафот этган.
Москва шаҳар мери Сергей Собянин эса чоршанба куни давомида пойтахт томон учиб келаётган 17 та Украина дрони йўлда тутиб олиниб, йўқ қилинганини айтди.
