Ўзбекистонда 11 та банк жаримага тортилди

Марказий банк ҳузуридаги Банк назорати қўмитаси 2026 йил февраль ойида ўтказилган 7 та йиғилиш давомида жами 43 та масалани кўриб чиқди ва тегишли қарорлар қабул қилди. Бу ҳақда Марказий Банк матбуот хизмати хабар берди. 

 

Банк назорати қўмитаси маълумотига кўра, масалаларнинг 30 таси рўйхатга олиш ва рухсат бериш йўналишига тўғри келади. Улар қаторида кредит ташкилотлари уставига ўзгартиришларни рўйхатдан ўтказиш, устав фондидаги улушларга рухсат бериш, аудиторларга сертификат тақдим этиш, микромолия ташкилотларини рўйхатдан ўтказиш ҳамда тижорат банклари раҳбарияти ва муҳим ходимлар номзодларини кўриб чиқиш бор.

 

Шунингдек, кредит ташкилотларининг молиявий ҳолатига оид 13 та масала муҳокама қилинган. Хусусан, пруденсиал меъёрларга риоя этилиши, инспекция натижалари, истеъмолчилар ҳуқуқларини ҳимоя қилиш, киберхавфсизлик талаблари ҳамда молиявий хизматларни “тартибга солиш қумдони” доирасида синовдан ўтказиш масалалари кўриб чиқилган.

 

Шунингдек, қонунчилик талабларига мувофиқ фаолиятини ташкил этмаганлиги учун ҳамда инспекция ва ўрганишлар давомида аниқланган камчиликлар учун  11 та банкка нисбатан жарима санкциялари қўлланилди.

 

Пруденсиал норматив талабларига риоя этилмаганлиги, ўз фаолиятини қонунчилик ҳужжатлари талабларига белгиланган тартибда мувофиқлаштирмаганлиги ҳамда ўрганишлар давомида аниқланган камчиликлар учун 14 та банк ва 4 та тўлов ташкилоти чора ва санкциялар қўлланилиши тўғрисида огоҳлантирилди.

 

Бундан ташқари, 8 та банкка нисбатан вужудга келиши мумкин бўлган йўқотишларнинг банк молиявий барқарорлигига салбий таъсирини камайтириш, уларда макропруденсиал буферлар шакллантиришини таъминлаш мақсадида банк акциядорларига оддий акциялари бўйича дивидендлар тўлаш орқали фойдани тақсимламаслик талаби белгиланди.