Ўзбекистонда банклардан 500 долларгача валютани паспортсиз сотиб олишга рухсат берилиши мумкин
Марказий Банк лойиҳани жамоатчилик муҳокамасига қўйди.
Ўзбекистон Марказий банки томонидан эълон қилинган норматив-ҳуқуқий ҳужжат лойиҳасига кўра, тижорат банкларида нақд чет эл валютасини сотиб олиш тартибига ўзгартиришлар киритилиши таклиф этилмоқда.
Лойиҳада жисмоний шахсларга 500 АҚШ долларигача бўлган нақд валютани банкка паспорт тақдим этмасдан сотиб олишга рухсат берилиши мумкинлиги назарда тутилган. Амалдаги тартибга кўра, ушбу лимит 100 АҚШ долларини ташкил этади.
Ҳужжатга кўра, тижорат банклари эквиваленти 500 АҚШ долларидан ошган миқдорда чет эл валютасини сотиб олаётган жисмоний шахсларни лозим даражада текширишини йўлга қўйиш таклиф этилмоқда.
Бундан ташқари, мижозни лозим даражада текшириш талаблари қўлланиладиган ҳолатларга ҳам ўзгартириш киритиш назарда тутилган. Амалдаги қоидаларга кўра, базавий ҳисоблаш миқдорининг 500 бараварига тенг ёки ундан ошган суммада банк ҳисобварағини очмасдан ёки ундан фойдаланмасдан операциялар амалга оширилганда мижознинг шахсига аниқлик киритилиши керак. Муҳокамага қўйилган лойиҳада ушбу чегарани 175 млн сўм миқдорида белгилаш таклиф этилган.
Мазкур лойиҳа юзасидан жамоатчилик муҳокамаси жорий йил 4 апрелга қадар давом этади.
