Ўзбекистонда гўшт нархи бир ой ичида сезиларли даражада қимматлашди

Иқтисодиёт ва молия вазирлиги маълумотларига кўра, Ўзбекистонда гўшт нархи сўнгги бир ой ичида сезиларли қимматлашиб, 8 фоизгача кўтарилди.

 

25 март ҳолатига Тошкент шаҳридаги “Эски жува” (Чорсу) бозорида мол гўштининг улгуржи нархи 75−108 минг сўмни ташкил этди. Махсус турдаги мол гўшти қовурғаси 75−80 минг, сарпанжа 85−95 минг ва сони 90−100 минг сўм атрофида сотилмоқда.

 

Музлатилган импорт гўшти эса минимал 85 минг, максимал 110 минг сўмдан нархланяпти. Қўй гўштининг улгуржи нархи эса 85−110 минг сўмни ташкил этди.

 

Божхона қўмитаси маълумотларига кўра, Ўзбекистонга 2026 йил январь–февраль ойларида 156,9 миллион долларлик гўшт ва гўшт маҳсулотлари импорт қилинган. Шу импортнинг асосий қисми қорамол гўштига тўғри келган: икки ой давомида умумий қиймати 120 миллион доллар бўлган 25,9 минг тонна мол гўшти олиб келинган.

 

Иқтисодчи Отабек Бакиров гўшт нархининг ошишини Россияда касаллик тарқалиши натижасида фермерлардан чорва молларининг тортиб олиниши, шунингдек, Қозоғистоннинг Россиядан тирик чорва ва гўшт импортини ҳамда уларнинг транзитини тақиқлаши билан изоҳлади.

 

Президент Шавкат Мирзиёев февраль ойида ўтказилган йиғилишда импортга қарамликни камайтириш учун чорва озуқаси масаласини тизимли ҳал этиш зарурлигини таъкидлаган. Жорий йилда қўшимча 60 минг гектарда озуқа экинлари етиштириш ва майда шохли қорамол наслини яхшилаш ишлари давом эттирилиши режалаштирилган. 

 

Ўтган йили Мўғулистондан 100 минг бош қўй ва эчки олиб келинган бўлса, жорий йилда ҳам ушбу йўналишдаги импорт ҳажми сақлаб қолиниш режалаштирилган.