Ўзбекистонда никоҳни бекор қилишда ярашиш муддати узайтирилиши мумкин

Оила кодексига ўзгартириш ва қўшимчалар киритиш тўғрисидаги қонун лойиҳаси эълон қилинди. Ҳужжатга кўра, суд орқали никоҳни бекор қилмоқчи бўлган эр-Хотинларга ярашиш муддати амалдаги олти ой ўрнига бир йилгача узайтирилиши таклиф қилинмоқда.

 

Лойиҳани Оила ва хотин-қизлар қўмитаси илгари сурди. Ҳужжатда таъкидланишича, амалдаги қонунчиликда оила муносабатларининг муҳим жиҳатлари тўлиқ қамраб олинмаган. Хусусан, ФҲДЁ орқали ажралиш жараёнида оиладаги ҳақиқий вазият, низоларнинг келиб чиқиш сабаблари ва уларни ҳал этиш имкониятлари етарлича ҳисобга олинмайди. Натижада, никоҳнинг бекор қилиниши кўпинча фақат расмий тартибга айланади. Шу муносабат билан суд томонидан эр-хотинга ярашиш учун бериладиган муддат кўпинча етарли эмас.

 

Шу сабабли, Оила кодексининг 40-моддасига ўзгартириш киритилиб, “олти ойга” деган ибора ўрнига “бир йилгача” деган жумла киритилиши таклиф қилинмоқда. Бу эр-хотинларга никоҳни қайта кўриб чиқиш ва оилавий низоларни ҳал қилиш учун кўпроқ вақт беради.

 

Лойиҳада суд ва бошқа органлар томонидан болалар билан боғлиқ масалаларда қуйидаги ўзгартиришлар киритилиши кўзда тутилган:

Вояга етмаган болалар никоҳ бекор бўлганидан сўнг ота-онанинг қайси бири билан яшашини суд белгилайди, шу жумладан уларнинг турар жойини таъминлаш тартиби ҳам аниқланади.

 

Суд боланинг алоҳида яшаётган ота-онаси билан мулоқот қилиш тартибини белгилаш имкониятига эга бўлади.

 

Болалар учун ундирилган алиментлар боланинг номига очилган банк ҳисобига ўтказилади, маблағларнинг тўплами ва сарфланиши васийлик ва ҳомийлик органлари томонидан назорат қилинади.

 

Никоҳ муддати бир йилдан кам бўлган оилаларда ажралиш ҳолатида болаларга таъминот бериш мажбурияти киритилади. (Зўравонлик билан боғлиқ ҳолатлар бундан мустасно.)

 

Шунингдек, суд ва тегишли ҳокимият органларига хабардор қилиш тартиби янгиланади: “уч кундан кечиктирмай” деган жумла ўрнига электрон ҳукумат тизими орқали хабардор қилиш амалга оширилади.