Австралия эронлик сайёҳлар учун киришни вақтинча тақиқлади
Чеклов 26 мартдан кучга кирган бўлиб, тахминан 6 800 нафар виза эгасига таъсир кўрсатади.
Австралия ҳукумати амалдаги визага эга бўлган Эрон фуқароларининг мамлакатга киришини 6 ой муддатга вақтинча тақиқлади. Бу ҳақда мамлакат ички ишлар вазири Тони Бурк баёнотига таяниб BBC хабар берди.
Мазкур қарор расмийларга кўра, айрим эронлик сайёҳлар виза муддати тугагач мамлакатни тарк этмаслиги ёки қайтиб кета олмаслиги эҳтимоли билан изоҳланган. Вазирнинг таъкидлашича, Австралияда доимий қолиш ҳукумат томонидан назорат қилинадиган онгли сиёсий қарор бўлиши керак.
Чеклов 26 мартдан кучга кирган бўлиб, тахминан 6 800 нафар виза эгасига таъсир кўрсатади. Шу билан бирга, айрим истиснолар ҳам мавжуд:
— Австралия фуқароларининг турмуш ўртоқлари ва фарзандларига киришга рухсат берилади;
— Фуқароларнинг ота-оналари учун “ҳамдардлик асосида” алоҳида кўриб чиқиш мумкин.
Қайд этилишича, ушбу чоралар фақат Эрон фуқароларига нисбатан қўлланмоқда ва бошқа давлатларга татбиқ этилмайди. Қонун лойиҳаси март ойи бошида, Эрон аёллар футбол делегациясининг айрим аъзоларига гуманитар визалар берилганидан сўнг илгари сурилган.
Қарор Австралия ичида танқидларга сабаб бўлди. “Бошпана изловчилар ресурс маркази” вакиллари ва сиёсатчилар, жумладан Яшиллар партияси сенатори Девид Шубриж ушбу тақиқни инсон ҳуқуқларига зид чоралар сифатида баҳолади.
Танқидчилар фикрича, бу қарор Австралия ҳукуматининг Эрон аҳолиси хавфсизлигини қўллаб-қувватлаш борасидаги баёнотларига зид келади.
