Эпштейн иши бўйича жабрланувчилар АҚШ Адлия вазирлиги ва Google’ни судга берди

Молиячи Жеффри Эпштейн иши билан боғлиқ бир гуруҳ жабрланувчилар АҚШ Адлия вазирлиги ҳамда Google компаниясига қарши жамоавий суд даъвоси киритди. Бу ҳақда NBC News хабар бермоқда.

 

Даъво аризасида таъкидланишича, ҳукумат Эпштейн иши бўйича ҳужжатларни ошкор қилиш жараёнида жабрланувчиларнинг шахсий ҳаёти ва хавфсизлигини етарли даражада ҳимоя қилмаган. Аксинча, тезкор ва кенг кўламли ошкор қилиш сиёсати устувор вазифа сифатида қўйилган.

 

Суд ҳужжатларига кўра, АҚШ Адлия вазирлиги тахминан 100 нафар жабрланувчининг шахсий маълумотларини очиқ манбаларда эълон қилиб, уларнинг шахсини ошкор қилган. Кейинчалик ушбу маълумотлар расмий ёзувлардан олиб ташланган бўлса-да, жабрланувчилар интернет платформалари, хусусан Google қидирув тизими орқали бу маълумотлар қайта тарқалишда давом этаётганини билдирган.

 

Даъвогарларнинг таъкидлашича, шахсий маълумотлар қидирув натижаларида ҳамда сунъий интеллект томонидан яратилган контентда ҳамон кўринмоқда. Натижада жабрланувчилар яна психологик босим ва таҳдидларга дуч келмоқда: уларга номаълум шахслар томонидан қўнғироқлар қилинмоқда, электрон хатлар юборилмоқда ва айрим ҳолларда жисмоний хавфсизлигига таҳдидлар билдирилмоқда.

 

Жабрланувчилар суддан АҚШ Адлия вазирлигидан ҳар бири учун камида 1000 доллар миқдорида компенсация ундиришни сўрамоқда. Шунингдек, Google компаниясидан шахсий маълумотларни дарҳол ва тўлиқ ўчириш ҳамда етарли миқдорда жарима товон пули ундирилишини талаб қилмоқда.

 

Маълумот учун, Жеффри Эпштейн 2019 йил июль ойида АҚШда вояга етмаган қизларни жинсий эксплуатация қилишда айбланиб ҳибсга олинган эди. Унга қарши жиноий иш 2019 йил 10 август куни қамоқхонада вафот этганидан сўнг ёпилган.