Покистон Афғонистондаги ҳарбий операцияларини қайта бошлади
Исломобод ҳарбий амалиётлар белгиланган мақсадларга эришилгунга қадар давом этишини маълум қилди.
Покистон ҳукумати Афғонистон ҳудудида ҳарбий операциялар қайта бошланганини эълон қилди. Бу ҳақда Покистон Ташқи ишлар вазирлиги 26 март куни берган баёнотида маълум қилди, дея хабар бермоқда Reuters.
Расмийларга кўра, Рамазон ҳайити муносабати билан эълон қилинган вақтинчалик сулҳ муддати якунланган ва узоқ муддатли келишувга эришиш бўйича уринишлар натижа бермаган. Шу сабабли ҳарбий ҳаракатлар яна давом эттирилмоқда.
Покистон Ташқи ишлар вазирлиги вакили Тоҳир Андрабийнинг таъкидлашича, операциялар белгиланган стратегик мақсадларга эришилгунга қадар давом этади.
Сўнгги воқеалар қўшни давлатлар ўртасидаги муносабатларнинг кескинлашганини кўрсатмоқда. Можаронинг фаол босқичи ўтган ой бошланган бўлиб, тўқнашувлар икки томон учун ҳам жиддий йўқотишларга сабаб бўлгани айтилмоқда.
Кобул расмийларининг маълум қилишича, 16 март куни Покистон томонидан амалга оширилган ҳаво зарбаси натижасида пойтахт Кобулдаги реабилитация марказида 400 дан ортиқ киши ҳалок бўлган. Исломобод эса бу айбловларни рад этиб, зарбалар фақат террорчи гуруҳлар билан боғлиқ ҳарбий объектлар ва инфратузилмага қаратилганини билдирмоқда.
Покистон томони Толибон назоратидаги Афғонистон маъмуриятини ўз ҳудудида фаолият юритаётган қуролли гуруҳларни ҳимоя қилиш ва қўллаб-қувватлашда айбламоқда. Кобул эса бундай даъволарни рад этиб, мазкур муаммо Покистоннинг ички хавфсизлик масаласи эканини таъкидламоқда.
Аввалроқ Туркия, Қатар ва Саудия Арабистони воситачилигида эришилган сулҳ 24 март куни тугаган эди. Исломобод расмийлари Афғонистон томони хавфсизлик сиёсатини қайта кўриб чиқмагунча ҳарбий операциялар давом этишини билдирган.
