Путин тадбиркорларни урушни ихтиёрий молиялаштиришга чақирди — The Bell
Украинага қарши урушга маблағ ажратиш ташаббуси “Роснефт” раҳбари Игор Сечин томонидан илгари сурилгани айтилмоқда.
Россия президенти Владимир Путин йирик бизнес вакиллари билан ўтказилган ёпиқ учрашувда урушни давом эттириш ва уни молиялаштириш масалаларини муҳокама қилди. Бу ҳақда манбаларига таяниб, The Bell хабар берди.
Маълум қилинишича, учрашув Россия саноатчилар ва тадбиркорлар иттифоқи қурултойидан сўнг бўлиб ўтган. Оддий ҳолларда бундай мулоқотлар мазмуни ошкор этилмайди, сўнгги йилларда эса иштирокчилар рўйхати ҳам махфийлаштирилган.
Манбаларга кўра, Путин учрашувда урушни давом эттириш режалари ҳақида гапирган. Хусусан, у “урушни давом эттирамиз” ва “Донбасс чегараларигача борамиз” мазмунида фикр билдиргани айтилмоқда.
Шундан сўнг президент бизнес вакилларига давлат бюджетига ихтиёрий бадаллар киритишни таклиф қилган. Манбалардан бирига кўра, “Оғир даврда бизнесдан қўшимча маблағ жалб қилиш” ғояси “Роснефт” раҳбари Игор Сечинга тегишли бўлиб, Сечин бу ҳақда бир кун аввал Путинга мактуб йўллаган. Маблағ жалб қилиш воситаси сифатида ҳарбий облигациялар чиқариш таклиф этилган.
Айрим бизнесменлар учрашувнинг ўзидаёқ ташаббусни қўллаб-қувватлаган. Хусусан, Сулеймон Керимов 100 миллиард рубль ажратишга ваъда бергани айтилмоқда. Яна камида бир йирик тадбиркор ушбу ғояни қўллаб-қувватлаган, аммо маблағ миқдорини очиқламаган.
