Тошкент вилоятида аёл киши бўлгани учун бир фуқаро ишга олинмади
Аёл омбудсманга мурожаат қилгач, унинг меҳнат ҳуқуқлари тикланди.
Тошкент вилоятида ишга қабул қилиш жараёнида жинсига кўра камситишга дуч келган аёлнинг меҳнат ҳуқуқлари тикланди. Бу ҳақда Олий Мажлиснинг Инсон ҳуқуқлари бўйича вакили (омбудсман) хабар берди.
Маълум қилинишича, фуқаро А.Й. 2026 йил январь ойида иқтисодий соҳадаги ташкилотлардан бирига ишга жойлашиш учун суҳбатдан ўтган, ариза топширган ва электрон шартномани имзолаган. Шундан сўнг уни ишга қабул қилиш бўйича буйруқ чиқиши кутилган.
Бироқ кейинчалик унга ушбу лавозимга аёл киши қабул қилинмаслиги билдирилган. Мурожаатчи бу қарор унинг малакаси ёки иш тажрибаси билан эмас, балки жинси билан боғлиқ бўлганини таъкидлаган.
Хабарга кўра, ҳолат Конституцияда белгиланган тенглик тамойиллари ҳамда камситишларсиз меҳнат қилиш ҳуқуқига зид ҳисобланади. Мазкур мурожаат назоратга олиниб, Омбудсманнинг ҳудудий вакили ва Давлат меҳнат инспекцияси ходимлари иштирокида ўрганилди.
Ўрганишлар натижасида фуқаронинг меҳнат ҳуқуқлари тикланиб, у тегишли лавозимга ишга қабул қилинди.
Омбудсман иш берувчиларни номзодларни жинсига қараб эмас, балки уларнинг касбий малакаси ва салоҳиятига қараб баҳолашга чақирди.
