Тошкентда янги саноат зоналарини ташкил этишга мораторий жорий этилади

Ўзбекистонда атмосфера ҳавоси сифатини яхшилашга қаратилган “Тоза ҳаво” миллий лойиҳасини амалга ошириш чора-тадбирлари тўғрисидаги президент фармони қабул қилинди. Бу ҳақда Экология қўмитаси матбуот хизмати хабар берди.

 

Ҳужжатга мувофиқ, 2026–2030 йилларда атмосфера ҳавосининг сифатини яхшилаш бўйича қатор устувор вазифалар белгиланди. Хусусан, атмосферага чиқариладиган ифлослантирувчи моддалар ҳажмини 10,5 фоизга камайтириш, транспорт воситаларидан чиқаётган зарарли моддалар миқдорини 10 фоизга қисқартириш, шунингдек PM2.5 заррачалари меъёридан ошиб кетадиган кунлар сонини камайтириш кўзда тутилган.

 

Шунингдек, атроф-муҳитга таъсир даражаси бўйича I ва II тоифадаги саноат корхоналарида автоматик мониторинг станциялари ҳамда чанг ва газни тозалаш ускуналарини ўрнатиш мажбурий этиб белгиланади. Бу орқали саноат корхоналаридан чиқаётган зарарли чиқиндилар устидан назоратни кучайтириш режалаштирилган.

 

Фармонга кўра, 2026 йил 1 апрелдан бошлаб Тошкент шаҳрида янги саноат зоналарини ташкил этишга номаълум муддатга мораторий жорий этилади. Мазкур чеклов хизмат кўрсатиш ёки молиявий хизматларга асосланган зоналарга татбиқ этилмайди.

 

Бундан ташқари, Тошкент шаҳридаги экологик вазиятни яхшилаш бўйича фаолият юритаётган махсус комиссия ваколатлари 2027 йил 1 мартгача узайтирилди. Комиссия бундан буён “Атроф-муҳит ҳолатини яхшилаш бўйича шошилинч чора-тадбирларни амалга ошириш бўйича Республика махсус комиссияси” номи билан фаолият юритади.

 

“Тоза ҳаво” миллий лойиҳаси босқичма-босқич ҳудудларда жорий этилади. Жумладан, 2026 йил 1 июлгача Фарғона вилояти, Андижон вилояти ва Наманган вилоятида; 1 августгача Тошкент вилояти, Сирдарё вилояти, Жиззах вилояти ҳамда Самарқанд вилоятида; 1 октябргача Қашқадарё вилояти, Сурхондарё вилояти, Навоий вилояти ва Бухоро вилоятида; 1 декабргача эса Қорақалпоғистон Республикаси ва Хоразм вилоятида амалга оширилади.

 

Бундан ташқари, саноат корхоналарида чанг ва газни тозалаш, энергия тежамкор ускуналар ўрнатиш, автоматик мониторинг тизимларини жорий этиш ҳамда яшил технологияларни кенг қўллашга алоҳида эътибор қаратилади. Тижорат банклари ушбу ускуналарни харид қилиш учун имтиёзли кредитлар ажратиши белгиланган.