Ўзбекистонда Суперлига ва Пролига клублари даромад солиғидан озод этилди
Клублар 2026 йил 1 апрелдан 2029 йил 1 апрелга қадар бўлган даврда даромад солиғини тўламайди.
Ўзбекистонда Суперлига ва Пролигада иштирок этувчи футбол клублари футболчилари жисмоний шахслардан олинадиган даромад солиғини тўлашдан озод қилинади. Бу ҳақда Президентнинг тегишли қарорида кўзда тутилган.
“Спорт соҳасини молиялаштириш механизмларини такомиллаштириш ва соҳага тадбиркорлик субъектларини жалб қилишни кенгайтириш чора-тадбирлари тўғрисида”ги президент қарорига мувофиқ клублар 2026 йил 1 апрелдан 2029 йил 1 апрелга қадар бўлган даврда даромад солиғини тўламайди ҳамда улар учун ижтимоий солиқ ставкаси 1 фоиз миқдорида белгиланади.
Шунингдек, Суперлигада иштирок этувчи 16 та клубнинг ҳар бирига 35 миллиард сўмдан ажратилиши белгиланган. 2027 йилда бу маблағ 30 миллиард сўмга, 2028 йилда эса 25 миллиард сўмга туширилади.
Қарорга кўра, Спорт вазирлиги ҳузурида Спорт соҳасида ташаббусларни қўллаб-қувватлаш жамғармаси ташкил этилади.
2026 йил 1 апрелдан спорт федерация (уюшма)си фаолияти билан боғлиқ йиллик барча харажатларнинг камида 20 фоизи миқдорида ҳомийлик маблағи киритган тадбиркорни спорт федерация (уюшма)ларининг ижро органларига киритиш йўлга қўйилади. Профессионал футбол клублари фаолияти билан боғлиқ бўлган йиллик барча харажатларнинг камида 20 фоизи миқдорида ҳомийлик маблағи киритган тадбиркор ёки тадбиркорлар гуруҳига профессионал футбол клубини ишончли бошқарувга бериш амалиёти жорий этилади.
