Ўзбекистонда журналист ва блогерлар учун “Медиа ҳафталик” таълимий лойиҳаси старт олди
Лойиҳа республика бўйлаб қарийб 12,5 минг иштирокчини қамраб олади.
Ўзбекистонда журналистлар, блогерлар ва матбуот котиблари учун мўлжалланган йирик таълимий-амалий лойиҳа — “Медиа ҳафталик” бошланди. Контент маркази томонидан ҳамкор ташкилотлар билан биргаликда ташкил этилаётган лойиҳа замонавий медиа муҳитидаги тезкор ўзгаришлар, ижтимоий тармоқлар ва сунъий интеллект ривожи, шунингдек, фейк хабарлар оқими шароитида соҳа вакилларининг касбий кўникмаларини мустаҳкамлашга қаратилган.
Мазкур лойиҳа республика бўйлаб 12,5 мингга яқин иштирокчини қамраб олиши кутилмоқда. Дастур доирасида жорий йилнинг 30 мартдан 26 июнига қадар барча ҳудудларда 5 кунлик интенсив ўқув-семинарлар ва маҳорат дарслари ўтказилади.
Тренинглар давомида мамлакатнинг етакчи медиа экспертлари, муҳаррирлар ва продюсерлар иштирокида контент яратиш, фактчекинг, рақамли гигиена, SMM, стратегик коммуникациялар каби долзарб йўналишлар бўйича назарий ва амалий машғулотлар ташкил этилади. Машғулотлар тележурналистлар, босма нашр вакиллари, блогерлар ҳамда давлат идоралари матбуот котиблари учун алоҳида йўналишларда олиб борилади.
Ўқув машғулотларида иштирокчилар реал медиа кейслар асосида ишлаш, профессионал хатоларни таҳлил қилиш ҳамда замонавий медиа ёндашувларини ўрганиш имкониятига эга бўлади.
Тренинглар якунида қатнашчиларга махсус сертификатлар топширилади.
Медиа-эстафетанинг илк босқичи 30 март куни Қорақалпоғистон Республикасида бошланади. Ҳар бир ҳудуддаги ўқув дастури якунида соҳа вакилларини бирлаштирувчи йирик Медиа форум ташкил этилиши режалаштирилган.
Лойиҳада иштирок этиш истагида бўлган номзодлар Ёшлар ишлари агентлигининг ҳудудий бошқарма ва бўлимларига мурожаат қилишлари мумкин.
Ҳудудлар кесимида “Медиа ҳафталик” ўтказилиш саналар:
- 30 март – 3 апрел: Қорақалпоғистон Республикаси
- 6 апрел – 10 апрел: Хоразм вилояти
- 13 апрел – 17 апрел: Сурхондарё вилояти
- 20 апрел – 24 апрел: Қашқадарё вилояти
- 27 апрел – 1 май: Самарқанд вилояти
- 4 май – 8 май: Навоий вилояти
- 11 май – 15 май: Бухоро вилояти
- 18 май - 22 май: Фарғона вилояти
- 25 май – 29 май: Наманган вилояти
- 1 июн – 5 июн: Андижон вилояти
- 8 июн – 12 июн: Жиззах вилояти
- 15 июн – 19 июн: Сирдарё вилояти
- 22 июн – 26 июн: Тошкент вилояти ва Тошкент шаҳри.
